Побач з Прэзідэнтам

У ліку 17 прадстаўнікоў Асіповіччыны, якім аказалі давер стаць дэлегатамі другога УНС, была Сняжана Жуковіч

ІІ Усебеларускі народны сход прайшоў у сталіцы 18-19 мая 2001 года. Да гэтага часу ў жыцці рэспублікі адбыліся значныя перамены. На двух рэферэндумах беларускі народ вызначыў канстытуцыйны лад краіны, вырашыў пытанне з дзяржаўнымі мовамі, зацвердзіў дзяржаўныя сімвалы. Была створана і эфектыўна дзейнічала сістэма дзяржкіравання.

ІІ Усебеларускі народны сход адыграў важную ролю ў жыцці краіны. Ён прыняў Праграму развіцця рэспублікі на 2001-2005 гады. Па сутнасці, гэта была беларуская мадэль эканамічнага развіцця. Асаблівая ўвага ў ёй была надзелена вырашэнню жыллёвай праблемы, забеспячэнню харчовай бяспекі краіны і павелічэнню яе экспартнага патэнцыялу. Сярод прыярытэтаў аказалася таксама ахова здароўя. Прэзідэнт Беларусі Аляксандр Лукашэнка паставіў задачу стварыць у краіне сучасныя даследчыя цэнтры і ўмацаваць матэрыяльна-тэхнічную базу медыцыны.

У сваім дакладзе «За моцную і квітнеючую Беларусь!» Кіраўнік дзяржавы абазначыў галоўны вынік развіцця краіны за мінулую пяцігодку: Беларусь адбылася як незалежная і самастойная дзяржава.

«Мы выбралі шлях эвалюцыйных пераўтварэнняў, і ён сябе апраўдаў», — падкрэсліў Аляксандр Рыгоравіч.

Звернемся да рэдакцыйнага архіва. «19 красавіка ў зале пасяджэнняў раённага выканаўчага камітэта адбыўся сход упаўнаважаных па выбарах дэлегатаў другога Усебеларускага народнага сходу ад Асіповіцкага раёна, — пісала газета «Запаветы Леніна» 25 красавіка 2001 г. — <…>. Ад імя аргкамітэта ўносяцца прапановы па кан­дыдатурах дэлегатаў другога Усебеларускага народнага сходу. Называюцца 15 прозвішчаў. Старшыня райвыканкама В.У. Шчэцька называе яшчэ два прозвішчы. Пачынаецца пайменнае галасаванне. Удзельнікі сходу многіх з кандыдатаў добра ведаюць. Ды і пры падборы кандыдатур на месцах да пытання падыходзілі сур’ёзна, з поўнай адказнасцю. І таму сярод упаўнаважаных ні тых, хто б галасаваў супраць, ні тых, якія ўстрымаліся, не было».

Дэлегатамі ІІ Усебеларускага народнага сходу сталі самыя ініцыятыўныя, аўтарытэтныя і неабыякавыя людзі з актыўнай грамадзянскай пазіцыяй. Адна з такіх Сняжана Жуковіч — у той час даярка калгаса “Усход”, паказчыкі работы якой былі лепшымі ў раёне. Сёння яна загадчык фермы ААТ “ВязаўніцаАгра”. Сняжане Яўгеньеўне пашанцавала стаць не толькі дэлегатам, але і членам прэзідыума другога УНС.

Вось што яна ўспамінае:

— Калі ехала на форум, вельмі хвалявалася: мне, 29-гадовай жанчыне з невялікага населенага пункта, аказаны высокі давер — удзельнічаць у форуме, які вырашае лёс Радзімы. У прэзідыуме знаходзілася ў акружэнні выбітных асоб краіны. Амаль побач сядзеў мітрапаліт Мінскі і Слуцкі Філарэт, які ў ходзе работы прапанаваў канцэпцыю ўзаемадзеяння царквы і дзяржавы. Яго выступленне было прысвечана захаванню міжканфесійнага міру, згоды і традыцыйных маральных каштоўнасцей у беларускім грамадстве. І, безумоўна, было вельмі прыемна бачыць і чуць Прэзідэнта. Аляксандра Рыгоравіча ўсе слухалі з вялікай цікавасцю. Яго насычаная, эмацыянальная прамова нікога не пакінула абыякавым. Больш не даводзілася так блізка сустракацца з Кіраўніком краіны, а другі Усебеларускі народны сход трывала захавала ў памяці і не раз расказвала аб ім калегам і родным.

Узгадаем некаторыя тэзісы выступлення Прэзідэнта на другім УНС, якія былі сказаны чвэрць стагоддзя таму, але не згубілі актуальнасці і сёння. 

«Мы стварылі эфектыўную дзейнічаючую сістэму дзяржаўнага кіравання — «вертыкаль улады». Пры гэтым мы зыходзілі з патрабавання народа».

«Заснаваная на дасягненнях беларускай навукі інавацыйная дзейнасць заклікана стаць тым лакаматывам, які выведзе на новыя рубяжы і экспарт, і жыллё, і харчаванне, і індустрыю».

«Апорнай канструкцыяй рэальнага сектара эканомікі з’яўляецца прамысловасць. Тут фарміруюцца асноўныя падатковыя паступленні. Тут засяроджаны асноўны вытворчы і экспартны патэнцыял краіны».

«У дзяржавы няма больш важнага клопату, чым клопат аб сям’і, дзецях. Іх сацыяльная абарона — ключавая задача дзяржавы. У бліжэйшы час мы разгледзім дадатковыя меры па падтрымцы сямей, якія маюць дзяцей».

«Наша знешняя палітыка і надалей будзе заставацца стабільнай і, што немалаважна, прагназуемай як для нашых суседзяў, так і для сусветнай супольнасці ў цэлым».

«Мы можам ганарыцца тым, што Беларусь сёння — адна з найбольш бяспечных краін свету і Еўропы».

Іна Заскевіч