Калі да работы — ахвота
У ААТ “ПратасевічыАгра” на ўборцы збожжа задзейнічаны тры камбайны
І на адным з іх працуе старшым камбайнерам Мікалай Агейчык. Тут ён нядаўна, аднак у сельскагаспадарчай справе далёка не навічок: ёсць стаж і ў Жорнаўцы, і ў лясгасе, і на машынна-трактарнай станцыі. Любіць і ўмее кіраваць рознай тэхнікай, у тым ліку і “караблём ніў”.
У свой час юны жыхар Пагарэлага дыплом далёка не шукаў. Нашто кудысьці ехаць, калі можна ў сваім райцэнтры атрымаць добрую прафесійную адукацыю? Ён і слесар па рамонце сельскагаспадарчых машын, і трактарыст-машыніст, і зваршчык. І ўсе атрыманыя веды і навыкі, як паказвае жыццё, запатрабаваныя і маюць практычную карысць. Некалькі гадоў таму і ўласны дом набыў у Асіповічах.
Працаваць у жніво без выхадных складана, але вытрымліваць нагрузку дапамагае разуменне важнасці моманту. У неспрыяльныя для ўборкі дні знаходзіцца іншы занятак. Калі ў чалавека ёсць гаспадарская жылка, ён ніколі не будзе сядзець без справы. За гэта і цэняць Мікалая калегі і кіраўніцтва.
Датычна ўмоў працы прэтэнзій няма: забяспечаны ўсім неабходным, каб работа была камфортнай. Ды і камбайн на лініі ўсяго другі сезон, малоціць спраўна.
Канечне, жонка Ксенія хацела б часцей бачыць мужа дома, але таксама з разуменнем адносіцца да яго пастаяннай занятасці. А для маленькага сына Косціка, калі здараецца трапіць на “татава поле”, і ўвогуле шчасце: тут так цікава! Падрасце хлапчук — будзе памочнікам. А чаму б і не?
Валянціна Корбаль
