Сёння ў раённым Цэнтры культуры і вольнага часу пройдзе прэзентацыя калектыўнага міжнароднага зборніка паэзіі і прозы «Горкі смак чарнобыльскага попелу», які стаў вынікам праекта, прымеркаванага да 40-годдзя аварыі на ЧАЭС,  Мінскага гарадскога аддзялення Саюза пісьменнікаў Беларусі.

У ролі складальнікаў выступілі старшыня аддзялення Міхаіл Пазнякоў і кіраўнік асіповіцкага літаратурнага аб’яднання «Літаратар» Тамара Кавальчук.

— Тэма Чарнобыля дагэтуль адгукаецца невыносным душэўным болем, — распавядае Тамара Васільеўна, ураджэнка вёскі Канатоп Нараўлянскага раёна Гомельскай вобласці, якая ў 2004 годзе пераехала ў Асіповічы.

Новы зборнік не першы ў бібліяграфіі паэткі. У 2021 годзе выйшла кніга твораў асіповіцкіх аўтараў «Чарнобыльніку вечная горыч». «Горкі смак чарнобыльскага попелу» пашырыў геаграфію і аб’яднаў паэтаў і празаікаў з Беларусі, Расіі і Ізраіля. Літаратурнае аб’яднанне «Літаратар» прадставілі вершы Аляксандра Анюхоўскага, Людмілы Піскун, Сяргея Бычкоўскага, Тамары Кавальчук, мемуары Юрыя Гарбачова.

— Нашы літаратары вельмі сур’ёзна падышлі да ўдзелу ў праекце, — адзначае кіраўнік літаб’яднання. — Юрый Гарбачоў распавёў пра ўдзел у ліквідацыі наступстваў аварыі на ЧАЭС. Людміла Піскун, Сяргей Бычкоўскі і я падзяліліся ўспамінамі аб страчанай малой радзіме. Па-майстэрску распавёў пра Чарнобыль і Аляксандр Анюхоўскі. Лічу, што кожнае слова, успамін пра той час сёння становяцца асабліва важнымі.

Агата ЗІМІНА.