Калонка рэдактара
Удзячны ўсім, хто разам з намі!
Паважаныя землякі!
Вось і яшчэ адзін год застаўся ззаду, стаў гісторыяй. Лёгкім яго наўрад ці хто назаве: у свеце правіў баль фінансавы крызіс, і ўжо па вызначэнні ён не мог не закрануць сваім “ласкавым” крылом родную Беларусь. Кожнаму з нас прыйшлося сабрацца і прыкласці ўсе намаганні, каб не толькі прыстойна выйсці з далёка не простай сітуацыі, а і захаваць дынаміку, развівацца, рухацца толькі наперад. І беларусы ў чарговы раз прадэманстравалі свае лепшыя якасці — стойкасць і цярпенне, мудрасць і працавітасць. І не толькі выстаялі — перамаглі!
Не самым простым стаў Год Быка і для рэдакцыі “раёнкі”. Штосьці з задуманага ўдалося давесці да ладу, асобнае не прынесла задавальнення. Але галоўнае — журналістам не сорамна глядзець у вочы землякам. Мы сумленна выканалі свае абяцанні і ні ў чым не падвялі людзей: перавыканалі “план” па выпуску газетных нумароў; не ўзялі ні капейкі з раённага бюджэту і скончылі год няхай і не надта з вялікім, але прыбыткам; заваявалі не адну грамату-дыплом на творчых конкурсах самага рознага ўзроўню і г.д.
Шчыра дзякую ўсім чытачам, кіраўніцтву раёна, дзелавым партнёрам і рэкламадаўцам за тую маральную і матэрыяльную падтрымку, дзякуючы якой калдектыў рэдакцыі адчуваў сябе іменна запатрабаваным і неабходным, што тыраж “раёнкі” і ў Год Тыгра не паменшыўся, а якраз вырас, што вы, дарагія землякі, і надалей засталіся з “Асіповіцкім краем”.
Прыемна, канешне, пачынаць год з пачуццём, што газету чыталі і чытаюць, што да нас, давяраючы, звяртаюцца. Але — і надта адказна. Журналісты гэта добра разумеюць і будуць рабіць усё магчымае, каб не расчараваць вас, дарагія землякі, і ў будучым, каб наша сяброўства і надалей толькі мацнела.
Задумак у рэдакцыйным “партфелі” дастаткова, і вы ўжо хутка пазнаёміцеся з нашымі творчымі праектамі. Але гэта — заўтра, а сёння мы з удзячнасцю зычым кожнаму падпісчыку разам з першым нумарам “раёнкі”-2010 невялічкі падарунак на памяць, і агучваем яшчэ адну сур’ёзную падзею ў жыцці “АК”, якая сведчыць, што мы не стаім на месцы. Цяпер з навінамі рэгіёна, пра якія рэгулярна расказваем, можна даведацца літаральна ў кожным кутку планеты: у газеты з’явіўся ўласны сайт у Інтэрнэце — http://gzt-akray.by. Яго ўдасканальванне-дапрацоўка працягваеццца, але факт, што істотны крок у пашырэнні інфармацыйнай прасторы зроблены, і мы толькі рады будучым сустрэчам-зносінам на сайце “раёнкі” са сваімі нова-старымі чытачамі.
Давайце ж будзем і надалей разам, паважаныя землякі! З Новым годам і Калядамі, толькі дабра ва ўсім вам і вашым блізкім!
Віталь КУЛАКОЎ,
галоўны рэдактар.