Вясна па графіку

Аграрыі ААТ “Асіповічыаграпрамтэхзабеспячэнне” ўчора паспяхова завяршылі адзін з важнейшых этапаў вяснова-палявых работ — сяўбу ранніх яравых коласавых культур.

Цёплае і па-сапраўднаму вясновае надвор’е, якое ўсталявалася ў сакавіку, і падрыхтаваная з восені глеба дазволілі аграрыям працаваць спакойна і засяроджана: 90 гектараў палёў ужо засеяна аўсом, 160 га — ячменем, 80 га — пшаніцай.

Адначасова ў гаспадарцы працягваюць сеяць шматгадовыя травы, якія пойдуць на корм жывёле. У гэтай справе заняты ў тым ліку і механізатар Уладзімір Венгура, які працуе ў сельгаспрадпрыемстве амаль дзесяць гадоў і за гэты час стаў насамрэч універсальным работнікам. Уладзімір паспяхова спраўляецца з усімі відамі палявых работ: вясной першым выводзіць тэхніку на сяўбу, летам становіцца за штурвал камбайна, восенню зноў садзіцца за плуг.

Галоўная задача для гаспадаркі зараз — падрыхтоўка глебы пад кукурузу. Сёлета гэтай культурай плануюць заняць больш за 1 000 гектараў, і ад таго, як пройдзе ворыва, шмат у чым залежыць кармавая база гаспадаркі.

Работнікі сельгаспрадпрыемства ўжо прыступілі да апрацоўкі палёў пад будучыя пасевы. Для выканання намечаных аб’ёмаў задзейнічаны ўсе наяўныя кадры, тэхніка працуе на поўную магутнасць.

Пакуль надвор’е песціць цяплом, але ў вопытных хлебаробаў ёсць адна агульная трывога: для дружных усходаў і добрага развіцця культур вельмі патрэбны дождж. Зямля ўжо паспела падсохнуць, і, хоць цяперашняе надвор’е спрыяе пасяўной, жыватворная вільгаць дазволіць атрымаць найлепшыя вынікі вясенніх намаганняў.

Елена Суета.