Cтравы па сямейных рэцэптах
У рамках праекта «Кожная пятніца — роднае, сваё» прапаноўваецца ўсім жадаючым па пятніцах апранацца ў адзенне мясцовых вытворцаў, слухаць беларускую музыку, размаўляць на роднай мове, гатаваць з мясцовых прадуктаў.
Шэф-повар спецыяльнай школы-інтэрната Алена Збанок расказвае, што яна і яе блізкія вельмі любяць страву, якую калісьці навучыла гатаваць бабуля Алена, што жыла ў вёсцы Такары Бабруйскага раёна. Дарэчы, і сваё імя жанчына атрымала ў гонар татавай матулі.
Дзеруны ў сям’і паважаюць усе, і гатуе іх Алена Капітонаўна незалежна ад дня тыдня. Нават госці, якія прыязджаюць з Масквы і Санкт-Пецярбурга, заўсёды просяць накарміць іх гэтай смачнай стравай.
Дзеруны нечым падобны на дранікі, але ў іх прыгатаванні выкарыстоўваюцца яшчэ і грудзінка, абсмажаныя морква, цыбуля, грыбы, а самі дзеруны пратушваюцца ў малацэ. Усе прадукты — з уласнай гаспадаркі.
А ад дзеда па матулінай лініі Алена навучылася рабіць “Пятроўскую салату”, названую па прозвішчы роднага чалавека. Інгрэдыентамі стравы з’яўляюцца ялавічына, грыбы, яблыкі, грэцкія арэхі, а запраўляецца ўсё самаробным маянэзам, прыгатаваным з яйка, алею і гарчыцы.
Павел Усцінавіч з ліку моцных гаспадароў, удзельнік Вялікай Айчыннай вайны, яго паважалі ў вёсцы Баяры, дзе дзядуля пражываў.
І зараз Алена Капітонаўна нярэдка бывае на малой радзіме бацькоў, а гатуючы фірменныя стравы сям’і, успамінае далёкае дзяцінства. І беражліва захоўвае саматканы абрус, вытканы бабуляй.
Іна Заскевіч
