Студзень — лепшы час для пачынанняў. Новую рубрыку “Смачныя нататкі” мы вырашылі прысвяціць гастранамічным маршрутам Асіповіччыны — ад сельскіх падворкаў і мясцовых ферм да ўтульных кафэ. Разам будзем даследаваць сезонныя яствы, рэгіянальныя далікатэсы і аўтарскія стравы мясцовых кухараў, раскажам гісторыі людзей. У фокусе — простыя рэцэпты з лакальных прадуктаў, яркія смакавыя ўражанні і культура гасціннасці раёна.

Жыхарка аграгарадка Карытнае Марына Шурахайлава ўжо не адзін раз з’яўлялася на старонках «АК»: мы распавядалі пра яе як прафесійнага работніка культуры, руплівую гаспадыню, клапатлівую маці. Зараз жанчыну ведаюць у раёне як арганізатара службы кейтэрынгу (выязны фармат абслугоўвання гасцей розных па фармаце мерапрыемстваў — аўт.) і адмысловага кулінара.

— Як здарылася, што бібліятэкар са шматгадовым вопытам вырашыў змяніць кніжкі і фармуляры на фартух і стос заказаў ад гурманаў?

— Для мяне гэта наступная, але невыпадковая прыступка асабістага развіцця. 12 гадоў працавала поварам у дзіцячым садку ў Карытным, з захапленнем і нават азартам гатавала арыгінальныя прысмакі для родных і сяброў і дасюль знаходжуся ў пастаянным пошуку цікавых смакавых спалучэнняў. Таму ідэя адкрыць службу кейтэрынгу і працаваць на сябе, якая з’явілася два гады таму, стала заканамернай высновай з назапашанага вопыту. Разам з тым сувязь з бібліятэкай нікуды не дзелася: пастаянна падтрымліваю ўзаемаадносіны з калегамі, з радасцю дапамагаю ў падрыхтоўцы мерапрыемстваў.

— Як ставіцца да новага занятку сям’я?

— Толькі станоўча. І на тое ёсць свае прычыны. Мы сталі пераможцамі раённага этапу рэспубліканскага сямейнага сельскагаспадарчага конкурсу “Уладар сяла” ў 2019 годзе, а ў воблас­ці занялі трэцяе месца. Мае кулінарныя здольнасці атрымалі высокую ацэнку ў абласным конкурсе “Маладая гаспадыня”, які праходзіў у Шклове ў 2018 годзе, і ў мясцовым конкурсе на лепшую кулінарную страву “Азбука Смаку”. Таму муж Уладзімір, дачка Яна, сыны Юрый і Рэнат разумеюць, наколькі для мяне важная магчымасць выйсці на новы, больш прафесійны ўзровень.

Гэткае паразуменне дапамагае і ў бытавых пытаннях. У нас ёсць уласная гаспадарка і прысядзібны ўчастак, якія дапамагаюць забяспечваць заказчыкаў смачным і натуральным прадуктам. Безумоўна, за ўсім патрэбны догляд, а аднаму з такім аб’ёмам работы справіцца няпроста. Таму мы з мужам усё робім разам, а дзеці, бачачы прыклад бацькоў, дапамагаюць без прымусу і напамінаў. Упэўнена: сумесныя праца, творчасць і адпачынак — лепшае, што можа даць дзецям сям’я.

— Наколькі складаным быў пераход да прыгатавання страў у павялічанай колькасці?

— Цяжка было толькі спачатку, калі патрабавалася набыць усё неабходнае: больш прадукцыйную тэхніку, прафесійны посуд і безліч расходнага матэрыялу — разнастайнай упакоўкі, шпажак, падносаў. Аднак нават на імгненне не пашкадавала затрачаных сродкаў, бо мноства станоўчых водгукаў кліентаў і магчымасць займацца любімай справай не вымяраюцца грашыма.

— Што можаце сказаць пра гастранамічныя густы асіпаўчан?

— У гэтым пытанні шмат залежыць ад узросту заказчыка. Людзі сярэдняга і старэйшага пакаленняў аддаюць перавагу знаёмым стравам, але робяць акцэнт на вялікай разнастайнасці і колькасці. Моладзь, наадварот, больш цікавіць незнаёмы смак. Гэта значыць страў можа быць няшмат, але ўсе яны даюць магчымасць адкрыць для сябе нешта новае. Таму ў гэтай узроставай аўдыторыі папулярныя гастрабоксы, якія складаюцца з асарці закусак. Але ўсім землякам падабаецца мясная прадукцыя нашага ўласнага прыгатавання: салёнае сала, сыравяленыя каўбасы, зельцы, рулеты і нават крывянка.

— Якім выключным рэцэптам са сваёй калекцыі можаце падзяліцца з чытачамі?

— Лічу фаршыраваную чарнаслівам і яблыкамі качку ў апельсінавым мусе сваёй візіткай. Менавіта з гэтай стравай атрымалася выйграць першы кулінарны конкурс.

Нягледзячы на мудрагелістую назву, працэс прыгатавання даволі просты. На качку вагой два з паловай кілаграмы спатрэбяцца чатыры яблыкі, 10-15 штук сушанага чарнасліву, 100 грам сметанковага масла. Птушку на ноч пакідаем у расоле з аднаго літра вады, трох сталовых лыжак солі і адной сталовай лыжкі цукру. Чарнасліў заліваем на 20 мінут кіпенем, пасля добра прамываем. На наступны дзень дастаём качку з расолу, прамываем, багата змазваем унутры мяккім сметанковым маслам, начыняем яблыкамі і чарнаслівам, замацоўваем шпажкамі. Наступны крок — прыгатаванне марынаду. Для яго спатрэбяцца сок і цэдра двух апельсінаў, пяць зубчыкаў часнаку, тры сталовыя лыжкі алею, дзве сталовыя лыжкі мёду, столькі ж гарчыцы, адна чайная лыжка папрыкі, любімыя спецыі. Змазваем качку апельсінавым марынадам і запякаем пры тэмпературы 160-170 градусаў паўтары гадзіны ў залежнасці ад духоўкі. Час ад часу паліваем тлушчам, які вытапіцца. Неверагодны смак гарантаваны!

Агата ЗІМІНА.