Фота БЕЛТА

Пазаўчора прэм’ер-міністр Беларусі Аляксандр Турчын па даручэнні Прэзідэнта краіны ўручыў медаль “За працоўныя заслугі” настаўніку хіміі і біялогіі сярэдняй школы № 3 Святлане Зайцавай.

Святлана Уладзіміраўна — асоба на Асіповіччыне вядомая. На працягу 34 гадоў яна працуе ў сярэдняй школе № 3, а ў цэлым у адукацыйнай сферы ўжо паўстагоддзя. За гэты час Святлана Зайцава зарэкамендавала сябе высокакваліфікаваным спецыялістам, які не толькі перадае веды, але і натхняе вучняў на дасягненні ў навуцы.

За апошнія 20 гадоў яна падрыхтавала больш за 130 пераможцаў конкурсаў даследчых работ па хіміі, біялогіі і геаграфіі. Яе вучні 34 разы станавіліся лаўрэатамі спецыяльнага фонду Прэзідэнта Рэспублікі Беларусь па сацыяльнай падтрымцы адораных навучэнцаў і студэнтаў.

Пад кіраўніцтвам Святланы Уладзіміраўны ў СШ № 3 актыўна функцыянуе экалагічнае маладзёжнае грамадскае аб’яднанне “Дзеля жыцця на Зямлі”, якое спрыяе фарміраванню ў моладзі экалагічнай свядомасці і адказнасці. Яна таксама ініцыявала стварэнне клуба экалагічнага маніторынгу, які займаецца вывучэннем і аховай навакольнага асяроддзя.

З 2020 года Святлана Зайцава ўзначальвае раённы апорны цэнтр па рэалізацыі праграмы ўстойлівага развіцця ў Магілёўскай вобласці. У 2023 годзе яна стала ўдзельнікам Міжнароднай адукацыйнай праграмы “Кліматычная шкатулка”.

Святлана Уладзіміраўна таксама з’яўляецца ініцыятарам і кіраўніком адукацыйнага праекта “Зялёныя школы”, які рэалізуецца ў СШ № 3 з 2020 года, і сааўтарам некалькіх рэспубліканскіх выданняў. Сярод іх “Флора Беларусі”, “Ключавыя батанічныя тэрыторыі Беларусі”, “Унікальныя прыродныя аб’екты Асіповіцкага краю” і “Чырвоная кніга рэдкіх раслін і жывёл Беларусі”.

У ліку яе ўзнагарод другая і трэцяя прэміі спецыяльнага фонду Прэзідэнта Рэспублікі Беларусь па сацыяльнай падтрымцы адораных навучэнцаў і студэнтаў, грамата Міністэрства адукацыі, ганаровыя граматы Міністэрства прыродных рэсурсаў і аховы навакольнага асяроддзя, Міністэрства адукацыі Рэспублікі Беларусь і ўпраўлення адукацыі Магілёўскага абласнога выканаўчага камітэта. У 2018 годзе яна была ўзнагароджана нагрудным знакам Міністэрства адукацыі “Выдатнік адукацыі”. У 2022 годзе Святлана Зайцава атрымала Падзяку міністра лясной гаспадаркі Рэспублікі Беларусь і Падзячны ліст аддзела па адукацыі Асіповіцкага райвыканкама.

Чарговая ўзнагарода — яркае сведчанне прафесійнага майстэрства. Уклад Святланы Зайцавай у развіццё адукацыі і экалогіі неацэнны, а яе праца будзе і далей натхняць новыя пакаленні.

Алена Суета