РАУС

У перыяд з 17 па 23 сакавіка адбылося 15 супрацьпраўных учынкаў: 6 крадзяжоў, 5 выпадкаў самагонаварэння, па 2 — захавання наркатычных рэчываў і нанясення цялесных пашкоджанняў.

14 чысла падчас санкцыянаванага агляду «падпольнага шынка» на вул. Голанта, дзе па папярэдняй інфармацыі вёўся незаконны гандаль алкаголем, было знойдзена 480 л  брагі і 112 л самагону.

18 чысла падчас прагулкі па ўзбярэжжы ракі Пціч знікла 48-гадовая мінчанка. Пры аглядзе маршруту, якім рухалася жанчына, знайшлі яе мабільны тэлефон і сумку. У той жа дзень у ЦРБ пасля няўдалай спробы самазабойства была дастаўлена 26-гадовая асіпаўчанка.

Увага! Апошнім часам узнавіліся спробы здзяйснення маёмасных злачынстваў з боку цыган. З гэтай нагоды РАУС раіць землякам, асабліва асобам сталага ўзросту, у зносінах з прадстаўнікамі гэтай нацыянальнасці праяўляць павышаную пільнасць.

РАСК

Узбуджана 13 крымінальных спраў.

Адразу 4 — у адносінах работнікаў ААТ «Бабруйскі завод буйнапанэльнага домабудаўніцтва», якія шляхам наўмыснага скажэння справаздачных дакументаў атрымлівалі незаконны дадатковы даход пры правядзенні работ на аб’ектах у Асіповіцкім раёне. Усе вядомыя на сёння выпадкі прыпісак датуюцца перыядам красавік-май мінулага года.

ДАI

Спынена 273 парушэнні правілаў руху, прыцягнута да адказнасці 8 п’яных вадзіцеляў, 15 парушальнікаў хуткаснага рэжыму, 19 пешаходаў без святлоадбіваючых элементаў на адзенні. Адбылося 10 нязначных ДТЗ.

Увага! Напрыканцы месяца пачаліся адразу некалькі буйных акцый па павышэнні бяспекі руху: 

20-30 сакавіка — Рэспубліканская прафілактычная акцыя «Цвярозасць — норма на дарозе» (28 чысла ў яе межах пройдзе  адзіны дзень бяспекі руху пад тым жа дэвізам);

24 сакавіка-2 красавіка — Дэкада дзяржтэхнагляду.

АУСТ

Узбуджана крымінальная справа па факту рабаўніцтва. Складзены 165 адміністрацыйных пратаколаў, у тым ліку на 15 неадэкватных пасажыраў. Затрымана 2 асобы, што знаходзіліся ў вышуку. Канфіскавана 209 кантрафактных відэадыскаў, 618 пачкаў кантрабандных цыгарэт, 15 л самагону і 12,5 л пратэрмінаваных алкагольных напояў.

Увага! 27 сакавіка з 10 да 12 гадзін начальнік АУСТ палкоўнік Уладзімір Мамсікаў правядзе «прамую тэлефонную лінію» па пытаннях падтрымання правапарадку на транспарце.

РАНС

12 чысла падчас выпальвання травы загарэўся і быў цалкам знішчаны агнём жылы дом у в. Коханаўка.

За парушэнне правілаў пажарнай бяспекі аштрафавана 8 уласнікаў дамоў, у тым ліку 3 — за правядзенне сельгаспалаў.

22 сакавіка па невядомай прычыне адбыўся пажар у гаспадарчай пабудове на прыватный сядзібе ў Асіповічах.

IАЖіРС

Складзена 11 адміністрацыйных пратаколаў: 7 — за браканьерскую здабычу рыбы, 2 — за гандаль вэнджанай рыбай у забароненым месцы, па 1 — за парушэнне правілаў палявання і продаж мядзведжай цыбулі.