ААТ “Асіповіцкі камбінат бытавога абслугоўвання” ўжо не першы год у тройцы лепшых КБА Магілёўшчыны. Напярэдадні прафесійнага свята аб рабоце камбіната расказвае яго дырэктар Раіса АЛЯШКЕВIЧ:

— Да мінулага года комплексна-прыёмныя пункты, якія дзейнічаюць у аграгарадках, мелі падатковыя льготы, але і летась агульны вынік атрымалі станоўчы. Аб’ём аказаных бытавых паслуг — больш за 4,3 мільярда рублёў — 122,1% да 2012 года. Рэалізацыя на ўзроўні 129,1% — у грашовым эквіваленце гэта звыш 8 мільярдаў. Калі браць удзельную вагу паўтара дзясятка нашых паслуг у агульным аб’ёме рэалізацыі, то першынство належыць пральні — 24%, пашыў адзення дае 23,5, цырульні — 19.

На раёне маем 11 комплексна-прыёмных пунктаў. Найбольш эфектыўна іх дзейнасць арганізавана ў Ліпені і Дрычыне, дзе робяць прыёмшчыцамі Ніна Каралёва і Святлана Бандарэнка. У КПП людзі звяртаюцца, каб адрамантаваць абутак альбо адзенне, здаць бялізну ў пральню ці хімчыстку і г.д. З задавальненнем народ набывае і нашы швейныя і трыкатажныя вырабы, у выпуску якіх найперш абапіраемся на патрэбы насельніцтва. Самыя папулярныя тавары, асабліва на вёсцы — пасцельная бялізна, рабочае адзенне, розныя безрукаўкі, трыкатажныя камплекты.

Як і любая арганізацыя, імкнемся знаходзіць дадатковыя хады, каб не толькі заставацца на плаву, але і мець сродкі для далейшага развіцця. У мінулым годзе ў Доме быту № 1 быў адкрыты магазін “Радуга”, дзе пакупніку прапануецца абутак і сумкі вядомых айчынных вытворцаў — напрыклад, ААТ “Луч”, вытворчага прыватнага ўнітарнага прадпрыемства “Каджыя”. Гандлёвая кропка патрабавала пэўных укладанняў — зрабілі добры рамонт, закупілі новае абсталяванне. I літаральна за некалькі месяцаў крама пацвердзіла, што яе адкрыццё было правільным крокам. Магчыма, з цягам часу арганізуем яшчэ адзін магазін.

КБА пастаянна ўдзельнічае ў розных выставах і кірмашах, нярэдка са сваёй прадукцыяй выязджаем на прадпрыемствы Бабруйска ці Мінска. Кожны год з таварам карысным, прывабным і, безумоўна, якасным бываем і на рэспубліканскім свяце працаўнікоў вёскі “Дажынкі”.

Слоў падзякі заслугоўвае работа многіх працаўнікоў. Сярод кагорты цырульнікаў адзначу Iрыну Чыжанок, Алену Гаўрусёнак, Наталлю Лясіну і Таццяну Літоўчанка. Лепшыя швейнікі-трыкатажнікі — Ганна Галацэвіч, Алена Рамановіч, Iрына Налівайка, Iрына Сафронава. Добра працуюць аператары: хімчысткі — Вольга Ліннік, пральных машын — Вольга Цумарава і Ганна Налівайка, таксама прыёмшчык заказаў рытуальных паслуг Аксана Хайтбаева і другія. Гэта не толькі майстры сваёй справы, але і людзі творчыя, з агеньчыкам.

Галоўны індыкатар нашай работы адзін: задаволенасць кліента. Iмкнемся працаваць так, каб землякі не сумняваліся: звярнуўшыся ў КБА, яны не толькі вырашаць пэўную праблему, але і набудуць добры настрой.