“У яе залатыя рукі”, — так адзываюцца аб Ірыне Трушэвіч педагогі спецшколы-інтэрната. І яны маюць рацыю, бо жанчына — пастаянная ўдзельніца розных выставак і конкурсаў, якія праводзяцца ва ўстанове адукацыі, дзе вучацца яе сынок — васьмігадовы Ваня — і дачушка Даша, якая на год старэйшая за брата.

Жыццё — штука непрадказальная, яна рыхтуе для кожнага нямала сюрпрызаў, і не заўсёды прыемных. Лёс выпрабоўвае на трываласць. Менавіта ў складаных сітуацыях чалавек праяўляецца ва ўсёй сваёй шматграннасці і, калі асабліва цяжка, шукае аддушыну, каб знайсці сілы для пераадолення перашкод і ўтрымання на жыццёвай плыні.

Для Ірыны такім сродкам рэлаксацыі стала рукадзелле. Дапамагаючы дзецям вырабляць падзелкі ў школу, яна нечакана адчула душэўны спакой, упэўненасць. Ёй захацелася гэтыя хвіліны падоўжыць. І жанчына захапілася вырабам букетаў са стужак. Кветкі наогул прыемна атрымліваць кожнаму. А букет, які зусім не вяне і заўсёды выглядае шыкоўна, дастаўляе ўдвайне больш пазітыўных эмоцый. Вось такія арыгінальныя падарункі Ірына і прэзентуе сваім блізкім.

Дар’і таксама прыйшлося па душы матуліна захапленне, і яна ахвотна дапамагае ёй у творчасці. Да таго ж работа з дробнымі дэталямі і рознымі выяўленчымі сродкамі не толькі фарміруе эстэтычны густ і прывучае да працы, але і развівае дробную маторыку, што дзяўчынцы толькі на карысць.

Да кожнага свята сваё аздабленне, лічыць Ірына. Напрыклад, у перадсвяточныя снежаньскія дні ўвесь свой вольны час яна прысвячае вырабу яркіх навагодніх упрыгожванняў. Пяшчотныя сняжынкі з фіямірану, казачныя ліхтарыкі, пакрытыя штучным інеем, так і зіхацяць, ствараючы святочную атмасферу. Ірына, як чалавек глыбока эмпатычны, дорыць іх, нібы Снягурачка, раздаючы дзецям і дарослым іскрынкі добрага настрою, веру ў цуд. А ён абавязкова здарыцца, калі шчыра спадзяешся і робіш добрыя справы, упэўнены і сын Ваня, які радуе аднакласніц заколкамі, зробленымі сумесна з матуляй.

Яшчэ адзін з відаў сувеніраў — упрыгожаныя вензелямі адрасна аформленыя кружкі. Майстрыха з любоўю выводзіць на іх стразамі ініцыялы таго, для каго стварае прыгажосць. У планах рукадзельніцы асвоіць вязанне кручком і вырабляць разнастайныя цацкі. У гэтым занятку разлічвае на дапамогу свекрыві, якая цудоўна вяжа.

І хоць дзяцей выхоўваць Ірыне даводзіцца адной і праблем, безумоўна, хапае, але наша гераіня не сумуе, яна шчыра ўсміхнецца і прымаецца за чарговую падзелку, каб несці навакольным свет і цяпло сваёй душы.