***

У сярэдняй школе № 4 прайшлі першыя заняткі аб’яднання па інтарэсах “Кітайская мова”. Іх наведалі 30 навучэнцаў 5-10 класаў, якія былі падзелены на дзве групы. Кітайскую мову хочуць ведаць многія, аднак пакуль немагчыма ахапіць усіх жадаючых. Кабінет для заняткаў работнікі школы аформілі ва ўсходнім стылі, ствараючы атмасферу пагружэння ў кітайскую культуру. Па словах дырэктара ўстановы адукацыі Святланы Сувеевай, у перспектыве плануецца стварыць у школе лінгафонны кабінет і кітайскі сад, што дазволіць больш эфектыўна і цікава вывучаць мову і культуру Кітая. Усё гэта стане магчымым дзякуючы плённаму супрацоўніцтву з Інстытутам Канфуцыя пры БДУ.

Летам у СШ № 4 была праведзена рэканструкцыя трэцяга паверха, што дазволіла стварыць сваю студыю выяўленчага мастацтва. Аб’яднанне па інтарэсах “Чароўная палітра” настаўніцы Святланы Падэры наведвае 24 хлопчыкі і дзяўчынкі 10-14 гадоў.

Яшчэ адна навіна СШ № 4 — электроннае табло, размешчанае ў рэкрэацыі другога паверха. На ім можна прачытаць расклад заняткаў, а таксама актуальную інфармацыю пра жыццё школы.

* * *

У Ялізаўскай СШ у рамках тэматычных заняткаў «Я. Мая сям’я. Мая Радзіма» прайшла дыялогавая пляцоўка «Моладзь — будучыня краіны». Разам з класным кіраўніком Аленай Безчаснай адзінаццацікласнікі гаварылі пра свае мары і ўдзел у развіцці Беларусі, абмяркоўвалі ўклад моладзі ў развіццё краіны. У мерапрыемстве ўдзельнічалі дырэктар школы Ірына Бодрусева, намеснік дырэктара па забеспячэнні вытворчасці і ідэалагічнай рабоце філіяла «Ялізава» ААТ «Гродзенскі шклозавод» Аляксандр Лаўрэнчыкаў, а таксама памочнік кіраўніка прадпрыемства Вольга Галацэвіч.

* * *

Дыпломам II ступені галоўнага ўпраўлення па адукацыі Магілёўскага аблвыканкама ў намінацыі «Ад захаплення да прафесіі жыцця» абласнога этапу рэспубліканскага конкурсу творчых работ «Праз творчасць у прафесію жыцця» ўзнагароджана выхаванка раённага цэнтра творчасці дзяцей і моладзі Алена Дунайка (кіраўнікі Анастасія Студнева, Наталля Пракопчык).

* * *

Землякі прынялі ўдзел ва Усебеларускім патрыятычным форуме «Адзінства народа ў памяці пакаленняў. 80 гадоў Перамогі», які адбыўся 15-16 верасня ў сталіцы. Настаўнік гісторыі СШ № 2 Наталля Шчарбачэня са сваімі навучэнкамі васьмікласніцамі Валерыяй Сукорай і Палінай Парываевай, кіраўнік музея баявой і працоўнай славы Ліпеньскай СШ настаўнік гісторыі Вольга Падвойская, актывіст школьнага музея Юрый Караваты і ўдзельнік алімпіяд па гісторыі Ілля Дрозд, старшыня ваенна-патрыятычнага клуба “Гарнізон” Віктар Кастроў сталі ўдзельнікамі ўрачыстага адкрыцця форуму, дыялогавай пляцоўкі, гледачамі маладзёжнага дакументальнага спектакля “Каляндар памяці. Старонкі лёсу”, наведвальнікамі разнастайных тэматычных выставачных праектаў.