Гэты год для работнікаў Асіповіцкага вытворчага ўчастка ААТ “Бабруйскі камбінат хлебапрадуктаў” праходзіць паспяхова. Дзяржзаказ амаль выкананы. Сельгаспрадпрыемствы краіны працягваюць прывозіць зерне на захоўванне.

Як паведамілі на прадпрыемстве, у бягучым годзе па дзяржзаказе Асіповіцкаму вытворчаму ўчастку неабходна закласці на захоўванне 29 780 тон зерня: 10,4 тысячы тон пшаніцы 3 і 4 класаў, 8,6 тысячы — жыта групы А, 5 тысяч — ячменю першага класа і столькі ж аўса 3 класа, 780 тон грэчкі. Усяго прадпрыемства нарыхтавала 56 тысяч тон зерня, у тым ліку 29 тысяч тон дзяржзаказу (98%). Важна адзначыць: аўса харчовага трэцяга класа прынялі ў тры разы больш (15 тысяч тон) запланаванага, што забяспечыць работу вытворчасці аўсянай прадукцыі да наступнага ўраджаю.

Геаграфія нарыхтоўкі ў вытворчага ўчастка вялізная: акрамя нашага раёна, тут захоўваецца і перапрацоўваецца зерне з Гомельскага, Клімавіцкага і Мінскага КХП, ААТ «Кіруючая кампанія холдынга «Аграмашсэрвіс»» (Магілёў), «Сервалюкс-Агра» (Магілёўскі раён), ААТ «Смалявічы Бройлер» і СЗАТ «Агралінк» (Быхаў).

Пасля бягучага рамонту былі запушчаны млын і крупацэх. Сёння тут вырабляецца мука пшанічная трох гатункаў, аржаная абдзірная і сеяная, а таксама крупы ячменна-пярловая, ячменна-ячная, аўсяная недраблёная, шматкі аўсяныя і грэцкія.

Па словах дырэктара Асіповіцкага ВУ Іны Зайцавай, прадукцыя карыстаецца попытам не толькі ў нашай краіне, але і Расіі. Хутка туды будзе экспарціравана 0,5 тысячы тон мукі аржаной абдзірной, а таксама аўсяная крупа.