Водар спелай нівы, гул магутных рухавікоў, размераны рух камбайна — гэта паўсядзённая рэальнасць экіпажа старшага камбайнера Паўла Грыцкевіча і яго памочніка Аляксандра Кірычэнкі. Чацвёрты год запар яны працуюць побач на палях ААТ “ВязаўніцаАгра”, дэманструючы высокі прафесіяналізм і зладжанасць.

Павел Грыцкевіч — механізатар з 11-гадовым стажам, для якога сёлетняя ўборачная  восьмая па ліку. За штурвалам з самага ранку да цямна — такі рытм жыцця стаў для яго звыклым. “Зімой адпачну, — кажа хлебароб, — а зараз трэба працаваць, каб хлеб своечасова сабраць”. Яго напарнік Аляксандр Кірычэнка пяць гадоў таму ўладкаваўся ў сельгаспрадпрыемства слесарам, а сёння ўжо спасціг усе тонкасці ўборкі ўраджаю пад чулым кіраўніцтвам свайго настаўніка. За чатыры гады сумеснай працы яны тройчы займалі ганаровае трэцяе месца сярод экіпажаў гаспадаркі. А па даных на ўчарашнюю раніцу Павел і Аляксандр намалацілі амаль 780 тон збожжа і рапсу.

— З маленства цікавіўся тэхнікай, — расказвае Аляксандр Аляксандравіч. — Вось і перарасла гэтая цікавасць у прафесію. Падчас жніва вельмі важна своечасова забяспечваць пастаўку неабходных запчастак. Затрымкі з рамонтам могуць звесці на нішто ўсе намаганні. А камбайн — своеасаблівая машына, складаны арганізм, які патрабуе сур’ёзнага падыходу.

Сёлета экіпажу даверылі новы зернеўборачны камбайн.

— Новая і старая тэхніка — гэта неба і зямля, — дзеліцца ўражаннямі Аляксандр Кірычэнка. — Клімат-кантроль, аўтаматычная цэнтральная змазка — гэтыя інавацыі значна палягчаюць справу і берагуць час. Працаваць стала камфортней.

Факт: нават самая сучасная тэхніка не застрахавана ад капрызаў надвор’я. Але экіпаж настроены аптымістычна. Аграрыі ўпэўнены, што галоўны залог поспеху — зладжанасць і ўзаемаразуменне. А хуткае запаўненне бункера — лепшае гэтаму пацверджанне.