З трыумфам вярнуліся юныя асіпаўчане з абласной спартакіяды школьнікаў-2014 па шахматах сярод зборных каманд раёнаў Магілёўшчыны.

Вучні чацвёртай школы Iлья Сідоранка (капітан каманды, двухразовы чэмпіён вобласці па шахматах), Кірыл Карачун, Аляксандр Грынцалёў і гімназісты Ягор Шатохін, Анастасія Зэйдэль і Вераніка Сенькіна далі сапраўдны бой сваім сапернікам у барацьбе за званне мацнейшых. Ужо ў першых турах нашы выйшлі наперад і з кожным наступным толькі паляпшалі вынік. Выхаванцы шахматнага клуба “Дэбют” неаднаразова ўдзельнічалі ў абласных і міжнародных спаборніцтвах — і вось ён, доўгачаканы кубак!

Першынство праходзіла 18-20 лютага на базе абласной СДЮШАР па шахматах і шашках па швейцарскай сістэме ў 7 тураў па правілах міжнароднай федэрацыі шахмат з кантролем часу — паўтары гадзіны на ўсю партыю.

Трэнер зборнай Ула-дзімір Веташаў адзначае, што гулялі роўна, і кожны з выхаванцаў заслужыў «золата». Напрыклад, тыя ж Насця і Вераніка вучацца ў другім класе, а з сямі партый пацярпелі паражэнне толькі ў адной. Хлопчыкі таксама выступілі на выдатна.

Так трымаць, чэмпіёны!