Конкурсы танцаў, бальных, ірландскіх ды іншых, — магутны стымул для развіцця танцавальнай культуры, уздыму папулярнасці тых ці іншых накірункаў і нават моды на гэткае баўленне часу. Выканаўцы народных танцаў гартуюцца ў нас па-рознаму: адзін з дзяцінства танчыў у ансамблі, другі рэгулярна наведвае адпаведныя вечарыны і клубы, а нехта некалькі разоў трапіў на майстар-клас і ўжо не ўяўляе ўласнага жыцця без вясёлых скокаў. Многія ў гэтым дасягнулі майстэрства, стварылі індывідуальны стыль і эстэтычны малюнак, маюць адметны нацыянальны строй.

Да такіх адносяцца самадзейныя артысты з Пратасевіч. Нядаўна яны пабывалі ў Мінску, дзе прынялі ўдзел у рэспубліканскім конкурсе беларускіх танцаў “Мяцеліца”, які праходзіў у сталічным Палацы мастацтваў. Юрый Гарбачоў і Ірына Чаропка (на здымку), Станіслаў Бабіна і Яўгенія Нужных з народнага ансамбля народнай песні і танца “Сузор’е”, Марыя Шавялёнак і Андрэй Фірстаў з дзіцячага ўзорнага ансамбля “Лянок”, Кацярына Ульянава і Уладзіслаў Князік з танцавальнага гуртка Пратасевіцкай СШ выйшлі на танцпол, каб паказаць сваё майстэрства. Імі выконваліся вядомыя папулярныя беларускія народныя танцы: “Лявоніха”, “Падыспань”, “Кракавяк”, “Какетка”, “Полька імправізаваная”, “Ночка”, “Карапет”, “Барыня”.

Прыемна, што сярод амаль 40 пар, якія прадстаўлялі розныя рэгіёны краіны, асіпаўчане апынуліся ў ліку лепшых і вярнуліся дадому з Дыпломамі ІІ і ІІІ ступеней і прызам глядацкіх сімпатый. Падрыхтавала іх да выступлення вядомы ў раёне адраджэнец беларускай аўтэнтыкі Наталля Еўдакімовіч.

— Ніхто на пляцоўцы не выконваў адзін і той жа стэрэатыпны малюнак, кожны паказаў штосьці сваё, — гаворыць яна. — Падчас конкурсу быў праведзены невялікі майстар-клас, дзе гледачы і ўдзельнікі маглі далучыцца да вывучэння старажытнай беларускай “Мяцеліцы”. Сярод гледачоў прысутнічалі не толькі аматары народных танцаў і мясцовыя спецыялісты, але і прафесійныя харэографы з Санкт-Пецярбургу.

Наперадзе — новыя конкурсы і сустрэчы. І галоўнае — у выніку падрыхтоўкі да такіх мерапрыемстваў падымаецца шырокі пласт нашай нацыянальнай культуры, які будзе перада-дзены наступным пакаленням.

Ніна ВІКТОРЧЫК.