Сёння ў ГЦК “Равеснік» адбылося пасяджэнне клуба педагагічных сустрэч, якое традыцыйна праводзіцца напярэдадні 8 Сакавіка.

Педагогі раёна сабраліся, каб павіншаваць са святам прадстаўніц цудоўнай паловы чалавецтва і адзначыць іх творчую, натхнённую працу на педагагічнай ніве. Намеснік старшыні райвыканкама Ганна Землянухіна выказала шчырыя словы ўдзячнасці за дастойны ўклад у справу выхавання падрастаючага пакалення і высокае прафесійнае майстэрства і ўручыла Ганаровыя граматы галоўнага ўпраўлення па адукацыі Магілёўскага аблвыканкама настаўнікам СШ №3 Ірыне Бубновай, СШ №2 Валянціне Галінеўскай і Таццяне Разгонавай, педагогам Ясенскай і Ліпеньскай СШ Ларысе Дубінчык і Наталлі Шпак. Высокую ўзнагароду таксама атрымалі настаўнік гімназіі Інэса Няверка, выхавальнік дзіцячага сада №9 Таццяна Новік і настаўнік-дэфектолаг СШ №3 Алена Флер’яновіч. Падзячным пісьмом райвыканкама адзначана праца метадыста раённага вучэбна-метадычнага кабінета Алены Гулік.

Працаўніц устаноў адукацыі павіншавала таксама начальнік аддзела па адукацыі райвыканкама Ірына Сяргейчык, уручыла Ганаровыя граматы і Падзячныя лісты аддзела, кветкі і музычны падарунак. Актыўных удзельнікаў прафсаюзнага жыцця Ганаровымі граматамі і Падзячнымі лістамі райкама Беларускага прафсаюза работнікаў адукацыі і навукі ўзнагародзіла старшыня райарганізацыі Марына Гірэнка.

🎼Падарункам для ўсіх удзельнікаў урачыстасці стала канцэртная праграма, падрыхтаваная творчымі калектывамі. Песні, танцы, вершы, тэатралізаванае прадстаўленне падарылі прыемныя эмоцыі і стварылі святочны настрой.