Самым прыемным у рабоце старшая медсястра аддзялення агульнай практыкі паліклінікі Ірына Шабуня лічыць магчымасць рэальна дапамагаць людзям

Садзейнічаюць гэтаму і прафесійныя навыкі, і асабістыя якасці. У медыцыне Ірына Андрэеўна ўжо тры дзясяткі гадоў, 25 з якіх займае пасаду старшай медсястры. Адна з яе галоўных задач — арганізаваць дакладнае функцыянаванне ўсіх 17 участкаў аддзялення.

Увогуле, сёння шмат чаго змянілася ў медыцынскай практыцы. Так, пашырыўся функцыянал сярэдняга медперсаналу: медсёстры і памочнікі ўрача могуць, напрыклад, вымяраць унутрывочны ціск, рабіць кардыяграму. Дыягнастычны вектар цікавы ёй самой, кансультуе-накіроўвае і маладых калег, а пры неабходнасці кансультуецца сама. Добра разумее: каб трымаць прафесіяналізм на высокім узроўні, павінна быць пастаяннае развіццё.