Тры рэчы — пазітыўнае стаўленне да рэчаіснасці, “чалавечы” лад жыцця, падтрыманне аптымальнай вагі цела — лічыць асновай даўгалецця ўрач анестэзіёлаг-рэаніматолаг аддзялення анестэзіялогіі і рэанімацыі райбальніцы Аляксандр Артамонаў

У Асіповічах доктар працуе з 1987 года пасля вучобы ў інстытуце і праходжання ардынатуры. На працягу 25 гадоў узначальваў аддзяленне, якое было адкрыта ў 1992 годзе. Колькі чалавечых жыццяў выратавана за гэты час, падлік не вёў, перакананы толькі ў тым, што заўсёды рабіў усё магчымае, каб сэрца пацыента не пераставала біцца.

Датычна людзей, якія трапляюць на рэанімацыйны ложак, можа сказаць адно: перш за ўсё ў іх павінна быць вялікае жаданне змагацца. “Калі чалавек хоча жыць, медыцына тут бяссільна”, — жартуе Аляксандр Пятровіч. Аднак гэта ў вольную хвіліну, а ў рэанімацыйнай палаце ці побач з аперацыйным сталом Артамонаў мудры, уважлівы і спагадлівы спецыяліст, якому нельга памыляцца, які ўмее прымаць хуткія і вывераныя рашэнні.