«Быць Таццяне…»
У Таццянін дзень многія жанчыны і дзяўчаты будуць святкаваць імяніны. А 10-класніца СШ № 1 Таццяна Мажэйка адзначае 25 студзеня яшчэ і свае народзіны!
— Не назваць мяне так было проста немагчыма, — гаворыць дзяўчына. — Напачатку ў раддоме нагадалі маме пра гэтае прыгожае імя, затым у царкве атрымалі благаславенне. Таму і вырашылі на сямейным савеце адназначна: быць Таццяне.
Лічыцца, што тыя, хто носіць такія імёны, любяць арганізаванасць, дамашнюю ўтульнасць, звыклыя да працы і мэтанакіраваныя. Падобныя якасці характэрны і для нашай юнай зямлячкі. Дзяўчынка добра вучыцца, шмат чытае, захапляецца музыкай, любіць парукадзельнічаць. Яна — пераможца раённай алімпіяды па французскай мове, у будучым збіраецца стаць студэнткай лінгвістычнага ўніверсітэта, каб звязаць сваё жыццё з педагагічнай дзейнасцю. Ёсць у яе і яшчэ адна мара: наведаць калі-небудзь сталіцу вывучаемай мовы — Парыж, каб на свае вочы ўбачыць Эйфелеву вежу і пасябраваць з сапраўднымі французамі. Ведаючы настойлівасць Таццяны, верыцца, што так яно і будзе.
