Справаздачы, абаротныя актывы, праводкі, калькуляцыя, плацёжныя даручэнні — для недасведчанага работа бухгалтара здаецца сумнай і руціннай. Але толькі не Марыі Пяшко.

Калісьці выпускніца СШ № 2 марыла стаць настаўнікам, але з цягам часу пераглядзела свае планы і адправілася вывучаць бухулік у Бабруйскі аграрна-эканамічны каледж, а затым Беларускі дзяржаўны эканамічны ўніверсітэт. Яшчэ ў час вучобы праніклася прафесіяй, адчула яе знутры ў час практыкі, а затым і работы на заводзе аўтаагрэгатаў і УКП ЖКГ.

І вось ужо дзевяць гадоў працуе яна на прадпрыемстве па перапрацоўцы малака. Спачатку намеснікам галоўнага бухгалтара ВУП “Малочны полюс”, затым бухгалтарам і вядучым бухгалтарам філіяла “Асіповіцкі” ААТ “Бабушкина крынка”. Словам, ужо працяглы час займаецца складаннем балансу прадпрыемства і работу сваю лічыць цікавай, разнастайнай і нават творчай, таму што пры ўзнікненні нейкіх неардынарных сітуацый пачынаецца пошук выйсця і нярэдка ўдаецца знайсці свой падыход, крэатыўнае рашэнне, якое дапаможа і ў далейшым.

Марыя Васільеўна асабіста вядзе падаткі, сабекошт гатовай прадукцыі, кантроль за ўчасткамі пяці падначаленых калег. І камандай сваёй цалкам задаволена, бо добрае ўзаемаразуменне садзейнічае эфектыўнай рабоце.

Хоць сфера яе дзейнасці лічбы і лікі, але за кожным з іх стаяць пэўныя паказчыкі работы калектыву, параметры выпускаемай прадукцыі. Марыя Васільеўна за час работы вывучыла як паслядоўнасць вытворчага працэсу, так і работу асобных участкаў, таму яна зараз і бухгалтар, і ў пэўнай меры тэхнолаг, эканаміст, маркетолаг.

Рабочы дзень вядучага бухгалтара не заўсёды нарміраваны, нярэдка даводзіцца затрымлівацца позна ўвечары, каб закрыць праводку або дапісаць справаздачу. Здаралася і некаторыя святы сустракаць за рабочым камп’ютарам. Шмат часу траціць на вывучэнне нарматыўна-прававой базы, але сям’я з разуменнем ставіцца да Марыінай работы. Муж Мікалай, калі трэба, і вячэру прыгатуе, і ўрокі праверыць у дзяцей. Жанчына задаволена сваёй работай і з гонарам адзначае, што мае дачыненне да выпуску малочнай прадукцыі з лагатыпам “Бабушкина крынка”. Дарэчы, выбіраючы ў магазіне прадукты, заўсёды аддае перавагу малочцы свайго холдынга, якому давярае.

Любімы сыр сям’і Пяшко — “Сулугуні”. А калі прыязджаюць сваякі з Брэстчыны, ахвотна набываюць асіповіцкія глазураваныя сыркі.

Для вядучага бухгалтара мясцовага філіяла ААТ “Бабушкина крынка” ў гэтым дзве нагоды для радасці. Па-першае, прыемна разумець, што прадукцыя, да выпуску якой маеш дачыненне, з’яўляецца вядомым брэндам Асіповіччыны. А па-другое (і гэта прафесійна), кожная прададзеная адзінка прадукцыі — гэта прыбытак прадпрыемства, за які Марыя хварэе ўсёй душой.