РАУС

У перыяд з 13 па 19 студзеня адбылося па 2 крадзяжы і нанясенні цялесных пашкоджанняў і 1 — пагрозы забойствам. Выяўлена 3 факты захавання наркатычных рэчываў. Затрымана асоба, якая ўцякла ад суда. Раскрыта раней здзейсненае злачынства — крадзеж.

Вядзецца праверка абставін заўчаснай смерці 3 чалавек, знойдзеных ва ўласных кватэрах без прыкмет знешняга ўздзеяння, а таксама траплення ў рэчку Свіслач жыхара в. Жорнаўка, які быў дастаўлены ў ЦРБ з прыкметамі моцнага пераахаладжэння. Па папярэдняй інфармацыі, ён праваліўся пад лёд падчас рыбнай лоўлі.

У ноч на 14 чысло невядомая асоба ўзламала ралет на акне гандлёвага павільёна на вул. 60 гадоў Кастрычніка і ўкрала каля 1,6 млн. руб., прадукты і цыгарэты.

У той жа дзень на вул. Дзмітрыева г. Асіповічы былі затрыманы два раней судзімыя не працуючыя мужчыны, у якіх мелася пры сабе 5,2 кг макавага насення.

16 студзеня шпіталізаваны ў райбальніцу 27-гадовы жыхар в. Ясень Асіповіцкага раёна, якому нанёс нажавое раненне ў грудную клетку раней не судзімы аднавясковец. Праз тры дні па той жа прычыне спатрэбі-лася медыцынская дапамога 24-гадовай жыхарцы п. Сасновы — цялесныя пашкоджанні ёй нанёс брат. Сцэнарый драматычных выпадкаў быў практычна аднолькавы: разам выпілі, потым пачалі сварыцца…

РАСК

Узбуджана 7 крымінальных спраў. У тым ліку адна — па факце спробы даць хабар супрацоўніку АДАI за прыпыненне дзеянняў па складанні пратакола аб адміністрацыйным правапарушэнні.

АДАI

Спынена 154 парушэнні правілаў руху, прыцягнуты да адказнасці 41 парушальнік хуткаснага рэжыму, 4 п’яныя вадзіцелі і 20 пешаходаў, што не мелі на адзенні святлоадбіваючых элементаў. Адбылося 9 ДТЗ.

Надвячоркам 17 чысла аўтамабіль “Субару” збіў пешахода, які пераходзіў вул. Сумчанкі ў Асіповічах каля аўтобуснага прыпынку “Дом быту”. Хуткасць руху машыны была мінімальнай, таму здароўю пацярпелага была нанесена мінімальная шкода. Што незвычайна: вадзіцель перад “зебрай” затармазіў і засяродзіў увагу на пешаходным пераходзе, аднак перашкоду ўсё ж не заўважыў.

Спецізалятар

Размешчана для працверажэння 29 асоб. Кожны шосты з трапіўшых грамадзян не мог рухацца самастойна і толькі дзякуючы аператыўнай эвакуацыі з марознай вуліцы пазбегнуў пераахаладжэння і абмаражэнняў.

РАНС

18 чысла ў в. Прудок Асіповіцкага раёна па невядомай прычыне загарэўся жылы дом. Пры пажары загінуў яго гаспадар — 54-гадовы непрацуючы.

IАЖіРС

Складзены пратакол па факце правядзення лесанарыхтовак без афармлення належных дакументаў.