У Лапіцкай сярэдняй школе інжынерны клас працуе другі год. Набралі ў яго летась дзесяцікласнікаў. А больш дакладна, увесь клас уключылі, бо складаўся ён з чатырох вучняў. Выбіралі вядучы напрамак сумесна — педагогі, дзеці і іх бацькі.

На павышаным узроўні гэтыя рабяты сталі вывучаць хімію і геаграфію — тыя дысцыпліны, па якіх у іх былі найбольш высокія адзнакі (ад сямі і вышэй).

Праграма дзясятага класа ў СШ не змянілася, адзначае настаўнік матэматыкі і інфарматыкі Тамара Шамак, толькі штотыднёва ў агульны расклад дадаваліся па дзве гадзіны хіміі і геаграфіі. А яшчэ з’явіўся факультатыў па інжынерным профілі. Вельмі спадабаліся вучням экскурсіі ў Беларуска-Расійскі ўніверсітэт, што знаходзіцца ў абласным цэнтры, а таксама сталічны БНТУ, дзе школьнікі бліжэй пазнаёміліся са студэнцкім жыццём, змаглі атрымаць агульныя звесткі аб ВНУ і прафесіі інжынера.

Год праляцеў хутка. І вось дзве дзяўчыны і два юнакі пераступілі парог выпускнога адзінаццатага класа. Нейкія высновы рабіць ужо можна, лічыць Тамара Іванаўна. Рабяты зараз не толькі ахвотна вывучаюць профільныя дысцыпліны, атрымалі ў іх межах многа дадатковай інфармацыі, але і па іншых прадметах паспяховасць не знізілі. Зараз актыўна выбі-раюць будучую прафесію, абмяркоўваючы паміж сабой. Безумоўна, будуць  улічваць ільготы, якія навучальныя ўстановы прадаставяць пры паступленні выпускнікам класаў дадзенага профілю.

Згодна з калегай і выкладчык хіміі Раіса Сакалоўская:

— Хіміяй рабяты зацікавіліся яшчэ ў сёмым класе, калі сталі вывучаць прадмет. Наведвалі і факультатыў. Сцяпан Важнік і Раман Пахваленка ўдзельнічалі ў алімпіядах па хіміі. Сцёпа нават у Нацыянальным дзіцячым цэнтры “Зубраня” адпачываў у змене для дзяцей, якія вывучаюць хімію на павышаным узроўні. Кожны ўрок у адзінаццатым класе для мяне — адно задавальненне: дзеці хутка ўсвойваць матэрыял, ахвотна рашаюць задачы. Заданні ЦТ нярэдка выкарыстоўваю на ўроках у якасці размінкі, і рабяты лускаюць іх як семачкі.

Цікава, што настаўнікі ў рабоце з інжынерным класам устанаўліваюць міжпрадметныя сувязі нават у тых дысцыплінах, якія на першы погляд маюць мала агульнага. Напрыклад, расказваючы аб здабычы карысных выкапняў на тэрыторыі раёна і рабоце філіяла “Асіповіцкае УМГ” ААТ “Газпрам трансгаз Беларусь”, актывізуюць веды і па геаграфіі, і па хіміі. Усебакова развіваюць маладое пакаленне жыхароў Лапічаў, рыхтуючы дастойную змену сённяшнім газавікам, тэхнолагам, тапографам, будаўнікам і людзям іншых прафесій.