У мінулую пятніцу сваіх наведвальнікаў гасцінна сустракаў Клуб маладых спецыялістаў аграпрамысловага комплексу. Ужо далёка не ўпершыню арганізуюць такое мерапрыемства сумесна ўпраўленне сельскай гаспадаркі і харчавання, аддзел ідэалагічнай работы, культуры і па справах моладзі райвыканкама, райкам прафсаюза работнікаў АПК і БРСМ. Кожны раз яно праходзіць на розных прадпрыемствах, і гэта дае магчымасць юнакам і дзяўчатам пашыраць свае веды пра раён, знаёміцца з работай асобна ўзятай вытворчасці.

Сёлета пасяджэнне праводзілася на Асіповіцкім вытворчым участку ААТ “Бабруйскі камбінат хлебапрадуктаў”. Распачалося знаёмства з экскурсіі па яго асноўных лініях. Апошнім часам перапрацоўшчыкі ажыццяўляюць рознабаковую мадэрнізацыю, і паказаць моладзі было што. Цікавіла не толькі абсталяванне, але і розныя вытворчыя факты. Напрыклад, далёка не кожны ведаў, што зерне, перш чым стаць крупой, праходзіць шлях у 6 кіламетраў, а самы папулярны прадукт — крупа, якая не патрабуе варкі. Вялікім попытам карыстаецца аўсянка. Прадпрыемствам наладжаны яе экспарт у Расію, Украіну, Сербію, Эстонію, Малдову. У 2014 годзе з канвеера будзе сыходзіць пшанічная мука, якую да гэтага тут не выпускалі.

Экскурсія плаўна перайшла ў дэгустацыю, якую правяла інжынер і старшыня мясцовай прафсаюзнай “пярвічкі” Ірына Кубар. “Распачынаць раніцу буду з асіповіцкай кашы!”— вырашылі для сябе многія, паспытаўшы духмяны і карысны прадукт.

Ірына Валяр’янаўна паведаміла таксама пра сёлетнія дасягненні прадпрыемства, а першы намеснік начальніка райсельгасхарчу Дзмітрый Міхалёў расказаў аб развіцці сельскагаспадарчай галіны ў раёне, падзяліўся планамі тэхнічнай і эканамічнай мадэрнізацыі, шляхамі яе рэалізацыі. Ну і, канечне, выказаў пажаданне, каб юнакі і дзяўчаты заставаліся на нашай зямлі.

Галоўны спецыяліст упраўлення сельскай гаспадаркі і харчавання Анастасія Дзяшчэня давяла інфармацыю, што сёлета ў сельгаспрадпрыемствы Асіповіччыны прыбыло 12 маладых спецыялістаў з вышэйшай адукацыяй і 44 — з сярэдняй спецыяльнай. Якія бонусы мае моладзь? Прадастаўляецца работа па спецыяльнасці, для жылля — асобны добраўпарадкаваны дом або пакой у інтэрнаце, выплачваюцца пад’ёмныя ў памеры службовага аклада, штомесяц ідзе даплата да зарплаты: 2 тарыфныя стаўкі першага разраду, пасля трох гадоў працы — тры.

Тым не менш, праблема замацавання моладзі існуе. Для яе вырашэння і вядзецца актыўна прафарыентацыйная работа з сельскімі школьнікамі. Безумоўна, гараджанам таксама не забараняецца абраць агранамію ці жывёлагадоўлю. Дарэчы, у мэтавых дагаворах, заключаных у гэтым годзе, прадугледжана даплата да стыпендыі ў памеры 5 базавых велічынь для студэнтаў ВНУ, 3 — навучэнцаў ССНУ. Напрыклад, філіял “Белшына-агра” ААТ “Белшына” акрамя прыбаўкі да стыпендыі прадугледжвае яшчэ і заахвочванне ў 2 базавыя велічыні тым, хто паспяхова здаў семестр. На сёння ў раёне адчуваецца дэфіцыт кадраў са спецыяльнасцю “заатэхнія”, “ветэрынарная медыцына”. На такіх спецыялістаў у першую чаргу і робіцца ўпор. Нямала моладзі спалучае працу з завочнай вучобай: 45 чалавек атрымліваюць веды ў ВНУ, 15 — у тэхнікумах і каледжах. У гэтым кірунку лепш за іншых працуюць калгасы “Лапічы”, “Авангард”, філіял “Белшына-агра”.

У сваім выступленні старшыня райкама прафсаюза работнікаў АПК Святлана Сідарэнка звярнула ўвагу на рэйтынг раёна ў вобласці: навічкі павінны ведаць, што трапілі ў развіты рэгіён, цанілі гэта і рабілі ўсё неабходнае, каб тут і застацца. Прафсаюз жа, у сваю чаргу, па меры магчымасці будзе садзейнічаць вырашэнню розных пытанняў. Падкрэсліла яна і тое, што ў нас створаны спрыяльныя ўмовы для кар’ернага росту моладзі — гэтаму ёсць нямала прыкладаў.

Галоўны спецыяліст аддзела ідэалагічнай работы, культуры і па справах моладзі райвыканкама Ларыса Волкава і першы сакратар райкама БРСМ Ганна Калодка запрашалі хлопцаў і дзяўчат далучацца да ўсіх тых добрых спраў, якія праводзяцца маладзёжнай суполкай, што дазволіць зрабіць жыццё больш насычаным і цікавым.

Безумоўна, далі слова і самім спецыялістам. Галоўны заатэхнік з СВК “Калгас “Карытнае” Сяргей Іўчанка прыйшоў у сельгаскааператыў у 2011 годзе. Яму падабаецца працаваць у жывёлагадоўлі, у калектыве добрыя ўзаемаадносіны. Ды і моладзі тут нямала — гэты калгас разам з “Авангардам” і “Белшынай” у ліку гаспадарак, дзе самая вялікая колькасць маладых спецыя-лістаў.

“Праца складаная, але цікавая”, — падвёў вынік Сяргей. Але ж таго, што будзе лёгка, ніхто і не чакаў! Ды і не трэба забываць, што менавіта на калгаснай ферме можна набыць каштоўны вопыт. Якіх яшчэ плюсаў трэба шукаць?

 Гэтая ж думка знайшла пацвярджэнне і ў прыватнай гутарцы з некаторымі ўдзельнікамі сустрэчы. Так, кожнаму хацелася б мець больш высокую зарплату, стабільны графік. Аднак такіх, хто выказваў толькі расчараванне сваім першым месцам працы, няма.

Што тычыцца самой сустрэчы, то яна стала разнастайнай дзякуючы ў тым ліку і музычным нумарам, якія прадставілі навучэнкі мясцовага каледжа. А яшчэ на памяць аб гэтым нерадавым дні засталіся падарункі, падрыхтаваныя арганізацыямі для сваёй моладзі.

Валянціна КОРБАЛЬ.