РАУС

У перыяд 9 па 15 снежня вызначана месцазнаходжанне злачынцы, які збег ад суда, асобы, што ўхілялася ад выплаты запазычанасці ў дзяржбюджэт.

У ноч з 15 на 16 чысло ў райбальніцу з закрытай чэрапна-мазгавой траўмай і ранай на патыліцы быў дастаўлены непрацуючы жыхар в. Радуцічы. Падчас сваркі, узнікшай пасля сумеснага распіцця спіртных напояў, яму нанёс некалькі ўдараў па галаве знаёмы з в. Слопішча.

РАСК

Узбуджаны крымінальныя справы ў адносінах да раней неаднаразова судзімага за маёмасныя злачынствы мужчыны, які паспрабаваў «прыватызаваць» чужы бушлат, і невядомай асобы, што ўкрала пакет з грашыма і асабістымі рэчамі ў работніцы ААТ «АЗАА». Апошні крадзеж, чый фінансавы эквівалент склаў 700 тысяч рублёў, адбыўся на тэрыторыі прадпрыемства.

ДАI

Спынена 226 парушэнняў правілаў руху, прыцягнута да адказнасці 3 п’яныя вадзіцелі, 31 парушальнік хуткаснага рэжыму, 43 пешаходы, якія не былі абазначаны святлоадбіваючымі элементамі. Адбылося 9 ДТЗ.
Каля 23 гадзін 10 чысла на перакрыжаванні вул. Дзяржынскага і Крупскай аўтамабіль «Пежо» не прапусціў «Аўдзі», якая рушыла па галоўнай дарозе. З-за няўважлівасці вадзіцель-парушальнік заплаціў дорага: акрамя матэрыяльных выдаткаў, ён атрымаў яшчэ і дастаткова сур’ёзныя цялесныя пашкоджанні.

РАНС

На працягу тыдня небяспечных узгаранняў на тэрыторыі раёна не адбылося, аднак 7 уласнікаў жылых дамоў былі прыцягнуты да адміністрацыйнай адказнасці за парушэнне заканадаўства аб пажарнай бяспецы.

IАЖіРС

Складзены 2 пратаколы па фактах парушэння правілаў лесакарыстання: незаконнае захаванне адыходаў будматэрыялаў юрыдычнай асобай у раёне пасёлка Савецкі і вываз лесу з няправільна аформленымі дакументамі. Прыцягнуты да адміністрацыйнай адказнасці браканьер за спробу здабычы рыбы з дапамогай сеткі. Супраць двух яго «калег», што займаліся незаконнай рыбалкай паўторна на працягу года, будуць узбуджаны крымінальныя справы.