У рамках агульнарэспубліканскай акцыі “Я выбіраю прафесію” ў суботу ў Асіповіцкім дзяржаўным каледжы прайшоў дзень адкрытых дзвярэй. Мерапрыемства наведалі больш за 70 школьнікаў і іх законных прадстаўнікоў.

Аб напрамках падрыхтоўкі спецыялістаў ва ўстанове, перавагах мэтавай падрыхтоўкі і асаблівасцях уступнай кампаніі ў гэтым годзе гасцям расказаў дырэктар каледжа Максім Ракаў. У ходзе адкрытага дыялогу выступілі прадстаўнікі арганізацый-заказчыкаў кадраў: намеснік дырэктара па ідэалагічнай рабоце, кадрах, сацыяльных і прававых пытаннях ЗАТ “АЗТМ” Максім Пікарэвіч, галоўны спецыяліст па кадрах упраўлення па сельскай гаспадарцы і харчаванні райвыканкама Анастасія Дзяшчэня, спецыяліст па кадравых пытаннях ТАА “ЗубрМантажБуд” Крысціна Шабуня.

Школьнікі наведалі майстар-класы па прафесіях, якім навучаюць у каледжы, атрымалі кансультацыю наконт паступлення ў гэтую ўстанову, у тым ліку на ўмовах мэтавай падрыхтоўкі, а таксама даведаліся, як прайсці прафарыентацыйнае тэсціраванне. Завяршылася мерапрыемства выставай калекцыі дзіцячага адзення “Спыніся”, якое было прадстаўлена на Рэспубліканскім фестывалі-конкурсе моды і фота “Млын моды”, і ўзораў дэкаратыўнай тынкоўкі.