Будні ваеннаслужачых Асіповіцкага гарнізона — гэта не толькі плац, заняткі і работа з баявой тэхнікай, але і ўзаемадзеянне з мясцовым насельніцтвам. І адна з папулярных форм апошняга — дні адкрытых дзвярэй.

Падобнае мерапрыемства арганізавалі і ў пятніцу на палігоне “Асіповіцкі”. На сустрэчу з ракетчыкамі і артылерыстамі завітала больш за паўтысячы дзяцей і падлеткаў з розных куткоў Беларусі: школьнікі, сувораўцы, кадэты і курсанты ваенна-патрыятычных клубаў і класаў. Удзел у мерапрыемстве прынялі начальнік ракетных войск і артылерыі Узброеных Сіл краіны палкоўнік Руслан Чэхаў, старшыні Асіповіцкага райвыканкама Канстанцін Жыгуцкі і райсавета дэпутатаў Уладзімір Рыжанкоў.

Ваеннаслужачыя Асіповіцкага гарнізона, а таксама часцей Паўночна-Заходняга аператыўнага камандавання прадэманстравалі гасцям баявую тэхніку і ўзбраенне, экіпіроўку ракетных войск і артылерыі. Натуральна, на машыны можна было залезці, а стралковую зброю патрымаць у руках. На гэтай жа пляцоўцы прадстаўнікі Ваеннай акадэміі прэзентавалі сваю ўстанову, расказалі пра магчымасці паступлення і ўмовы навучання. Але ж найбольш чаканым відовішчам стала, зразумела, блізкае знаёмства з узбраеннем артылерыстаў і ракетчыкаў. Гледачам расказалі пра гісторыю і тэхнічныя характарыстыкі, а таксама наглядна прадэманстравалі баявыя магчымасці самаходных артылерыйскіх установак “Гіяцынт”, “Акацыя”, “Гваздзіка”, гаўбіц “Мста-Б”, 120-мм мінамёта “Сані”. Пасля — перарыў на кашу і чай з палявой кухні. Апошні этап маштабнага мерапрыемства запатрабаваў пераезду на ўскраіну палігона каля аг. Пратасевічы. Менавіта там прайшла вогненная кульмінацыя ўсёй дзеі — “паказальнае выступленне” рэактыўных сістэм залпавага агню “Град” і “Ураган”.

— Аб’ядналі два важныя мерапрыемствы, — адзначыў палкоўнік Руслан Чэхаў. — У рэспубліцы адзначаецца дзень спаленых вёсак — мы шануем памяць загінулых ад дзеянняў фашыстаў. І ў гэты ж дзень паказваем нашаму падрастаючаму пакаленню, што ёсць такі род войскаў — ракетныя войскі і артылерыя. Увогуле, гэта мерапрыемства патрыятычнага выхавання, накіраванае на тое, каб даць разуменне маладому пакаленню, што такое Узброеныя Сілы, для чаго яны патрэбны. Дэманструем, што РВіА — гэта цікава, ні ў якім разе не страшна, што можна праходзіць і тэрміновую службу, і атрымаць ваенную адукацыю, і займаць афіцэрскія пасады.

Дарэчы, дзень адкрытых дзвярэй на “Асіповіцкім” правялі падчас лагернага збору з артылерыйскімі і ракетнымі падраздзяленнямі Паўночна-Заходняга камандавання. Ваеннаслужачыя павышаюць палявую вывучку і зладжанасць, навучаюцца прафесійным навыкам і ўменням, неабходным у баявых умовах, з улікам вопыту спецыяльнай ваеннай аперацыі і іншых сучасных узброеных канфліктаў.

— Шырока выкарыстоўваюцца найноўшыя сродкі сувязі, сучасныя гаджэты. На новы ўзровень выйшла і выкарыстанне сродкаў разведкі — у першую чаргу гэта беспілотнікі самалётнага тыпу і квадракоптары. Днямі на базе 51 абр мы ўпершыню адпрацавалі паражэнне цэлі высокадакладным боепрыпасам «Краснаполь» з выкарыстаннем цэлеўказання ад БПЛА «Арлан-30». Для нашых Узброеных Сіл гэта першы падобны вопыт, і ён вельмі ўдалы, — расказаў палкоўнік Чэхаў. — Сустрэча ж з моладдзю не толькі не перашкодзіла ваенным, але, наадварот, падтрымала іх баявы дух, у чарговы раз дала магчымасць адчуць значнасць сваёй дзейнасці. Цікава было  ўсім — і падлеткам, і ваеннаслужачым. Для апошніх гэта стала яшчэ і значнай эмацыянальнай падтрымкай. Так што вынік дня адкрытых дзвярэй выдатны!