Там, дзе калісьці патрабавалася брыгада рабочых, зараз упраўляецца адна магутная машына харвестар, якая ўяўляе сабой ключавое звяно сучаснага лесанарыхтоўчага комплексу, дазваляе эканоміць сродкі і час. Адным з васьмі харвестараў лясгаса і кіруе Аляксандр Бераснеў. Пачынаў калісьці трактарыстам, затым атрымаў спецыяльную падрыхтоўку і восем гадоў працаваў на форвардары. А потым і самую складаную ва ўпраўленні тэхніку асвоіў. Гэта азначае, што Бераснеў мае самы высокі, восьмы, кваліфікацыйны разрад. Сапраўдны прафесіянал, філігранна выконвае сваю работу, напрыклад майстэрства пры распілоўцы ствала ссечанага дрэва. Даўжыня гатовых бярвенняў можа адхіляцца ад зададзенай нормы не болей чым на тры сантыметры.

— Складанага тут нічога няма, — з усмешкай зазначае Аляксандр Віктаравіч. — Калі авалодаеш пэўным наборам навыкаў, працуецца з задавальненнем. А панарамныя вокны ў машыне дазваляюць на працягу ўсяго дня бачыць навакольныя краявіды, якія ствараюць найлепшы настрой. Наогул, у лесе працаваць вельмі прыемна: прырода, спевы птушак, цішыня, пах кветак — нібы ў рай трапляеш.

Як сапраўдны мужчына, пра цяжкасці ні слова. А між тым працу машыніста такой складанай тэхнікі бесклапотнай не назавеш. Неабходны дакладныя разлікі, уважлівасць, пастаянны кантроль за некалькімі дзясяткамі параметраў, выкананне правіл бяспекі, што стварае пастаяннае напружанне. Але сапраўдныя прафесіяналы не на гэтым акцэнтуюць увагу. Работа харвестара старонняму назіральніку нагадвае працу робата, а гэта вельмі цікава. Ці не аб такой мараць многія хлапчукі?