Была ў Асіповічах вежа — будзе кафэ

Пыталіся — адказваем

— Старая воданапорная вежа каля чыгуначнага вакзала ўжо які год уяўляе сабой тыповы недабуд. Ці ёсць перспектывы заканчэння гэтага аб’екта? У што наогул яна павінна пераўтварыцца?

Сяргей Д., асіпаўчанін.

Адказ на гэтае сапраўды інтрыгуючае пытанне дае ўласнік будынка — дырэктар ПГУП “Панатрэйд” Наталля ПАХОМЕНКА:

— Пераўтварэнне непатрэбнай гораду воданапорнай вежы ў пункт грамадскага харчавання пачалося яшчэ ў 2006 годзе, аднак па шэрагу прычын, сярод якіх галоўная — неабходнасць вялікіх інвестыцый у больш прыярытэтныя накірункі дзейнасці, гэты аб’ект давялося закансерваваць. Аднак сёння фінансавых перашкод ужо няма, так што работы на прывакзальнай вежы будуць скончаны, відавочна, на працягу 2014 года.

У адпаведнасці з праектам рэканструкцыі вежа пераўтворыцца ў кафэ-більярдны клуб, дзе адначасова можна будзе абслугоўваць як мінімум 50 наведвальнікаў.

Паколькі новы забаўляльны цэнтр прывязаны да галоўнай вітрыны Асіповіч — чыгуначнага вакзала, у ім плануецца забяспечыць дастойны ўзровень знешняга афармлення, высокі стандарт сэрвісу і, зразумела, даць землякам ды гасцям горада магчымасць пакаштаваць эксклюзіўныя стравы. Але — ніякай экзотыкі, будзем арыентавацца выключна на традыцыйную беларускую кухню.

Прынамсі, назва для новага кафэ яшчэ не прыдумана, таму буду ўдзячная за ўсе трапныя падказкі.