«Цыфра» ў Асіповічах. Перамены не да лепшага…
Пыталіся — адказваем
— Па якіх прычынах з сеткі тэлевізійнага вяшчання зніклі каналы “Ю” і “Еўраньюс”? — шэраг пытанняў такога зместу атрымала “раёнка” на мінулым тыдні. I пераадрасавала іх да кампетэнтнага спецыяліста — галоўнага інжынера ААТ “Спутник-ТВ” Iгара КУЛІКА. Па хвалюючай тэлегледачоў праблеме ён выказаўся наступным чынам:
— Узгаданыя каналы ў адпаведнасці з інтарэсамі іх праваўладальнікаў былі пераведзены на іншыя спадарожнікі-рэтранслятары, прыём сігналаў з якіх на існуючым абсталяванні нашага прадпрыемства немагчымы, а набыццё новай антэны і іншага рыштунку, неабходнага для ўзнаўлення трансляцыі, пакуль не мае эканамічнай мэтазгоднасці. Спецыялісты “Спутника“ шукаюць спосаб пераадолення азначанай тупіковай сітуацыі, аднак пакуль цяжка сказаць, наколькі плённымі будуць гэтыя намаганні.
Але гэта яшчэ не ўсе неадназначныя навіны для абанентаў кабельнага тэлебачання. Па папярэдняй інфармацыі, атрыманай ад кіраўніцтва шэрагу расійскіх медыяхолдынгаў, у бліжэйшыя месяцы можна чакаць істотнай змены ў колькасці і якасці інфармацыйнага напаўнення тэлеканалаў, якія транслююцца праз касмічныя спадарожнікі.
