“А мае ж вы залатыя памочнікі!” — ветліва сустракае ўжо знаёмых вучняў СШ № 4, якая знаходзіцца непадалёку,  87-гадовая Марыя Васільеўна Скітовіч. Нягледзячы на тое што яе няма ў спісах “замацаваных” за школай пажылых людзей, рабяты сюды наведваюцца часцяком: чаму б і не дапамагчы таму, хто побач? Скласці дровы, пачысціць снег — хіба будзе лішнім?

Аб юных валанцёрах з СШ № 4 землякі чулі, пэўна, не адзін раз, што і нядзіўна. Атрад “Добрае сэрца” ўжо на працягу 13 гадоў лепшы ў раёне, з 2013 года — у ліку лідараў у вобласці, не аднойчы адзначаўся і на рэспубліканскім узроўні. Такая стабільнасць гаворыць аб якаснай, шматвектарнай выхаваўчай рабоце з дзецьмі. Кіруе атрадам, які зараз аб’ядноўвае 65 юнакоў і дзяўчат з 8 па 11 класы, педагог-арганізатар Кацярына Гайдучонак. Яна і расказала, што дапамога пажылым людзям у расчыстцы снегу — далёка не асноўнае ў дзейнасці атрада. Праводзіцца шмат экалагічных акцый, напрыклад па ўборцы лесу, зборы адпрацаваных элементаў сілкавання, вырабе кармушак і шпакоўняў, падкормцы птушак і бяздомных жывёл. Значная ўвага надзяляецца прафілактычнай рабоце па бяспецы руху, далучэнні падлеткаў да здаровага ладу жыцця. Нядаўна да Дня інвалідаў правялі акцыю “Падары ўсмешку дзецям”, а зараз валанцёры актыўна рыхтуюцца да “Цудаў на Каляды”. Адным словам, калі маеш добрае сэрца — да ўсяго ёсць справа.

Ну а датычна расчысткі снегу, то наступным аб’ектам будзе тэрыторыя помніка-скульптуры на брацкай магіле партызан грамадзянскай вайны на вуліцы Крыловіча.