Шчаслівыя асіпаўчане
Шчаслівым стане пачатак гэтай зімы для многіх працаўнікоў СЗАТ “Асіповіцкі вагонабудаўнічы завод”: гасцінна адкрыў свае дзверы інтэрнат прадпрыемства. Трохпавярховы будынак знаходзіцца ў маляўнічым месцы, дзе з усіх вокнаў відаць лясныя краявіды. У новай пабудове ёсць добраўпарадкаваныя двух- і аднапакаёвыя кватэры, з асобнай кухняй і санвузлом, пакоі ў блоку.
У першую чаргу ключы атрымалі маладыя спецыялісты, якія прыбылі па размеркаванні або накіраваныя на работу ў адпаведнасці з дагаворам аб мэтавай падрыхтоўцы, а таксама сем’і і работнікі, якія ўжо даўно працуюць на прадпрыемстве і добрасумленна выконваюць свае службовыя абавязкі. Першачарговая ўвага надзяляецца і рассяленню рабочых асноўных прафесій. У інтэрнаце, які ўвогуле разлічаны на 100 месцаў, таксама будуць спыняцца на пэўны час і камандзіраваныя на завод прадстаўнікі іншых арганізацый.
Адной з першых сюды збіраецца перасяліцца сям’я ФЯДЗЬКО, якая ўжо літаральна днямі з арандуемых “квадратаў” пераедзе ў 2-пакаёвую кватэру. Дарэчы, Арцём і Алена патрапілі на вагонабудаўнічае прадпрыемства тры гады назад пасля вучобы ў Беларускім дзяржаўным універсітэце транспарту — абое атрымалі там спецыяльнасць інжынера-механіка. Цяпер Арцём — начальнік цэнтральнай завадской лабараторыі, а майстар Алена пакуль у дэкрэтным адпачынку з аднагадовай Златкай.
Настрой у маладой сям’і зараз асаблівы. Па-першае, гэта заўсёды радасць — займець сваё жыллё. Другі прыемны аспект — і абсталяванне, і мэбля тут з нуля. I наогул — вакол адчуваецца пазітыў! Ды і маленькай дачушцы хутка будзе з кім гуляць: на сяброў у інтэрнаце заўжды багата!
Валянціна КОРБАЛЬ.
