На мінулым тыдні Прэзідэнт краіны Аляксандр Лукашэнка падпісаў Указ аб узнагароджанні ордэнам Маці 227 жанчын.

Прыемна, што сярод іх і работніца Асіповіцкай дыстанцыі сігналізацыі і сувязі Інга Мініч. Наша зямлячка атрымала галоўную адзнаку мацярынскай славы ва ўрачыстай абстаноўцы ў Магілёўскім аблвыканкаме.

Інга з мужам Сяргеем выхоўваюць чатырох сыноў і дачку. Старэйшы, Аляксей, ужо атрымаў адукацыю і прыступіў да прафесійнай дзейнасці, Канстанцін вучыцца ў каледжы, Максім і Кацярына — гімназісты, а маленькі Саша пакуль рыхтуецца да наведвання дзіцячага сада, бо яму толькі паўтара года.

Сваю сям’ю Інга лічыць дружнай, з’яднанай і спартыўнай. Тата — настаўнік фізкультуры і сваіх дзяцей прывучае да спорту з ранняга ўзросту. Плаванне і футбол, лодачныя паходы і прагулкі ў лес, рыбалка і песні пад гітару — усё гэта гарманічна ўплятаецца ў стыль жыцця сям’і, дзе матуля, нягледзячы на загружанасць хатнімі справамі, — актыўны ўдзельнік усіх сумесных заняткаў.

На пытанне, як яна спраўляецца, жанчына толькі ўсміхаецца:

— Цяжка з адным, калі няма каму прыйсці на дапамогу. А ў мяне ў дадатак да мужа пяцёра памочнікаў. Ці ж гэта не радасць? Дарэчы, дзеці выхоўваюць адзін аднаго ўласным прыкладам. Так, Максім рана пачаў гаварыць, чытаць, гуляць у шахматы, бо ў настаўніках у хлопчыка былі два старэйшыя браты. Нават Саша шмат чаго паўтарае за хлопцамі, цягнецца за імі. Аляксей і наогул лепшы памочнік на кухні, Каця музычная дзяўчынка, любіць спяваць і танцаваць. А я, гледзячы на нашу сям’ю, адчуваю радасць і гонар.