Свіслацкі кірмаш” сабраў гасцей
Свіслацкі кірмаш” сабраў гасцей
На Яблычны Спас пляцоўку ля Свіслацкага Дома культуры напоўнілі вясёлы смех, музыка і духмяныя пахі разнастайных прысмакаў. Свіслачане і госці населенага пункта сабраліся разам на свята, якое бярэ карані з ХІХ стагоддзя.
Урачыстасць пачалася з прывітальнага слова старшыні Свіслацкага сельсавета Аляксея Трэцьякова. Ён падзякаваў усім, хто знайшоў час завітаць на імпрэзу, і выказаў спадзяванні, што традыцыя не будзе забыта і працягне сваё існаванне.
Далей гледачам была прадстаўлена канцэртная праграма, дзе творчыя нумары, акрамя мясцовых артыстаў, прадставілі калектывы Вязаўніцкага і Ялізаўскага сельскіх Дамоў культуры, аркестр 51 гвардзейскай артылерыйскай брыгады.
Які ж кірмаш без гандлю? Жадаючыя маглі паспрабаваць юшку, бліны, калдуны, дранікі, смажаную рыбу і шмат іншых смачных страў, прыгатаваных свіслацкімі гаспадынямі. Таксама сваю прадукцыю прадставіла Глускае райста, а бабруйскія прадпрымальнікі разам з надзіманай горкай і батутамі прывезлі поп-корн і салодкую вату.
Пасля таго як госці пакаштавалі ўсю смакату, удосталь патанчылі пад народныя спевы, іх паклікалі на забаўляльную праграму, падрыхтаваную дырэктарам Свіслацкага СДК Раісай Лапацінай. І дзеці, і дарослыя атрымалі зарад добрага настрою ў спаборніцтвах, дзе патрабавалася паказаць спрыт, розум і кемлівасць.
Асобна варта адзначыць удзел у кірмашы 336 рэактыўнай артылерыйскай брыгады і аддзела па надзвычайных сітуацыях. Вайскоўцы арганізавалі дэманстрацыю зброі і ўзбраення на радасць не толькі хлопчыкам, а і дарослым мужчынам, якія падыходзілі, бралі ў рукі зброю, успаміналі армейскія будні. Супрацоўнікі РАНС паказалі пажарную машыну, прылады для ліквідацыі пажару, распавялі пра складанасці працы выратавальніка.
— Сёлета на “Свіслацкі кірмаш” прыехалі жыхары Ялізава, Краснага, Слабады, — падводзіць вынікі Аляксей Трэцьякоў. — Народу сабралася багата. Думаецца, што пры такой увазе гэта мясцовая цікавостка будзе жыць.
