РАУС

У перыяд з 11 па 17 лістапада зафіксавана рабаўніцтва, згвалтаванне, угон аўтамабіля і самагубства, 2 выпадкі самагонаварэння. Затрыманы дзве асобы, якія ўхіляліся ад выплаты аліментаў.

Вядзецца праверка парушэння эканамічнага заканадаўства — перавозкі таварна-матэрыяльных каштоўнасцей без патрэбных дакументаў.

У ноч на 11 чысло ў лясным масіве каля п. Савецкі непрацуючы 28-гадовы асіпаўчанін, раней судзімы за ўгон аўтатэхнікі, згвалтаваў 25-гадовую жанчыну. Злачынца затрыманы, і ўжо ўстаноўлена, што ў тую ж ноч гвалтаўнік здзейсніў яшчэ адзін сур’ёзны супрацьпраўны ўчынак — угнаў аўтамабіль ВАЗ-21063.

ДАI

Спынена 206 парушэнняў правілаў руху, прыцягнута да адказнасці 3 п’яныя вадзіцелі, 50 парушальнікаў хуткаснага рэжыму, 34 пешаходы, якія не мелі святлоадбіваючых элементаў на  адзенні. Адбылося 3 ДТЗ.

12 чысла вадзіцель грузавога аўтамабіля «МАЗ» на шашы Мінск-Гомель каля Верайцоў наехаў на малалітражку «Шкода-Фаварыт», якая рухалася ў спадарожным накірунку. Вадзіцель легкавіка атрымаў цялесныя пашко-джанні і быў шпіталізаваны ў Асіповіцкую ЦРБ. Прычына недарэчнай аварыі — няўважлівасць шафёра «МАЗа».

АДАI нагадвае, што прамаруджваць з заменай зімніх пакрышак больш нельга: ноччу і раніцай праезная частка дарог ужо пакрываецца льдом. Да таго ж вадзіцелям трэба праяўляць максімальную ўвагу і асцярожнасць пры выбары хуткасці руху.

РАНС

12 чысля каля 15 гадзін загарэўся прыватны дом у в. Лапічы. Агнём часткова пашкоджана маёмасць, столь і сцены. У той жа дзень у 19 гадзін адбыўся пажар жылля ў в. Лочын, падчас якога загінуў гаспадар сядзібы — непрацуючы 59-гадовы мужчына.

15 лістапада ў в. Бозак таксама каля 19 гадзін загарэўся і быў практычна знішчаны агнём жылы дом.

IАЖіРС

Складзены 3 пратаколы па фактах незаконнай здабычы 37 кілаграмаў рыбы з сажалак ААТ «Рыбгас «Свіслач», па аднаму пратаколу — за браканьерскую здабычу дзвюх асобін андатры і стварэнне несанкцыянаванага сметніка ў водаахоўнай зоне Асіповіцкага вадасховішча.