Самае балючае пытанне для жыхароў ліпеньскіх вуліц Калініна, Гагарына, Палявой, Навасёлаў, Паўднёвай і вёскі Усціж — грунтовае пакрыццё. Работа па яго абслугоўванні, якая праводзіцца УКП ЖКГ, недастатковая, каб трымаць дарогі ў прымальным стане. Узгаданым вуліцам даўно патрабуецца падсыпка, але камунальная служба праводзіць толькі грэйдзіраванне раз у паўгода. У выніку мясцовыя аўтааматары рызыкуюць атрымаць пашкоджанні сваіх машын на такіх вось транспартных артэрыях…

Здзіўляе і тое, як у арганізацыі рэагуюць на сігналы аб дапамозе. Па словах старшыні Ліпеньскага сельсавета Уладзіміра Раманюка, на афіцыйныя звароты па абазначанай праблеме адказы прыходзяць рэдка і, як правіла, не даюць надзеі на перамены да лепшага. Канечне, магчымасці УКП ЖКГ небязмежныя, але ж пра інтарэсы жыхароў нашых вёсак, як здаецца, таксама трэба дбаць.