Каб захаваць памяць

Днямі адбылася прэзентацыя кнігі ветэрана педагагічнай працы, краязнаўца Мікалая Тамашова “Гісторыя адукацыі ў Дараганаўскім краі: дзень за днём, год за годам”.

У невялікай актавай зале Дараганаўскай сярэдняй школы, нягледзячы на летнія канікулы, было шматлюдна. Сюды прыйшлі жыхары аграгарадка, настаўнікі і проста зацікаўленыя, каб павіншаваць земляка з завяршэннем грунтоўнай працы. Шлях гэтай кнігі да чытача быў доўгім і марудным. Аўтару прыйшлося шмат разоў наведваць архівы, сядзець над падшыўкамі газет, сістэматызаваць матэрыял, сабраны некалькімі пакаленнямі настаўнікаў школы, каб па крупінках скласці агульную карціну. Пабачыць свет выданню дапамог асіповіцкі прадпрымальнік Валерый Цалуйка.

— Асноўная мэта — данесці да чытача звесткі пра навучальныя ўстановы, якія існавалі і існуюць на тэрыторыі сучаснага Дараганаўскага сельскага савета, — расказаў Мікалай Васільевіч. — Так, удалося даведацца, што першая школа знаходзілася пры царкве ў вёсцы Крынка і была адкрыта яшчэ ў 1862 годзе. Там навучаліся сем хлопчыкаў. Заканчваецца кніга матэрыялам са святкавання ў 2021 годзе векавога юбілею Дараганаўскай сярэдняй школы.

Жадаючыя бліжэй пазнаёміцца з выданнем могуць звярнуцца ў бібліятэкі школ горада і раёна.