17 лістапада — Дзень участковых інспектараў міліцыі

Маёр міліцыі Уладзімір Раманюк — вопытны работнік. Больш за дваццаць гадоў служыць у органах унутраных спраў, у тым ліку звыш дзесяці — у раённым аддзеле    ўчастковым інспектарам. Абслугоўвае тэрыторыю Вяззеўскага сельсавета — а гэта 21 населены пункт, дзе пражываюць больш за 2 тысячы чалавек і знаходзяцца буйныя арганізацыі — СВК “Калгас “Авангард” і ААТ “Рыбгас “Свіслач”, Вязскае і Брыцалавіцкае лясніцтвы, 6 садовых таварыстваў, 3 сельскія Дамы культуры, 2 ФАПы, школа і дзіцячы сад.

У дадатак служыць на варце парадку і ў Ліпенскім сельсавеце — пакуль месца ўчастковага тут вакантнае, таму даводзіцца “прыкрываць” некамплект. Адным словам, працаваць Раманюку прыходзіцца ў высокім тэмпе.

Участковы міліцыянер, можна сказаць, універсальны спецыяліст, у якога няма адной накіраванасці ў рабоце: усё, што датычыцца ўчастка, датычыцца і самога інспектара. Раманюк лічыць, што галоўнае ў яго справе — прафілактыка. Тут нібы ў медыцыне: лягчэй папярэдзіць хваробу, чым яе лячыць. Таму Уладзімір — часты госць ва ўстановах адукацыі, рабочых калектывах, дамах, дзе пражываюць абавязаныя асобы, і сем’ях, якія знаходзяцца ў сацыяльна небяспечным становішчы. Размовы з участковым, безумоўна, дапамагаюць крымінагеннай статыстыцы выглядаць лепш. Напрыклад, у сельсавеце няма дзяцей, якія стаяць на ўліку ў інспекцыі па справах непаўналетніх. Працаваць з дарослымі, канешне, цяжэй, тым больш — з незаконапаслухмянымі. Але і тут участковы спраўляецца. Сакрэт у індывідуальным падыходзе: камусьці патрэбна па-добраму растлумачыць, а на кагосьці і голас павысіць. Яшчэ Раманюк удзельнічае ў рэйдах, якія арганізуюць зацікаўленыя інстанцыі з мэтай выяўлення розных правапарушэнняў, напрыклад, браканьерства. Такія мерапрыемствы надзвычай небяспечныя: у злачынцаў, як правіла, ёсць зброя, якую ў любы момант могуць выкарыстаць супраць прадстаўнікоў закона. Прыбывае інспектар і ў складзе следча-аператыўнай групы на месца злачынства — без яго следству не абысціся, бо многае ведае пра людзей, якія пражываюць на ўчастку, а значыць, валодае цэннай інфармацыяй. I гэта далёка не ўся работа, якую выконвае ўчастковы.

Вось што гаворыць пра падначаленага першы намеснік начальніка РАУС Уладзімір Рыжанкоў:

— Работа ўчастковых інспектараў, а іх у нас роўна два дзясяткі, вельмі складаная — далёка не кожны можа справіцца з ёй. Таму людзі, якія займаюцца гэтай справай, заўсёды маюць такія чалавечыя якасці, якія цэняцца ў любой сферы. Раманюк жа — адзін з лепшых супрацоўнікаў РАУС. Калісьці Вяззеўскі сельсавет лічыўся самым праблемным. Уладзімір здолеў выправіць сітуацыю, нават званкі адтуль у “дзяжурку” паступаюць параўнальна рэдка — насельніцтва ведае свайго ўчастковага і пры неабходнасці звязваецца непасрэдна з ім. А яшчэ ён — выдатны настаўнік. У аддзеле ведаюць: калі ўзяўся курыраваць маладога работніка, з таго будзе толк. Участковы “выхаваў” больш дзясятка навічкоў, сёння яны маюць добрыя характарыстыкі, а некаторыя нават далёка пайшлі па кар’ернай лесвіцы і займаюць высокія пасады.

Дарэчы, Уладзімір Раманюк не толькі цэнны супрацоўнік, але і добры сем’янін. Мае чатырох дзяцей. Трымае гаспадарку. I з усім спраўляецца, усюды паспявае.

Тамара ГОРЛАЧ.