Рамонт двара — справа нятанная

Штогадова ў горадзе праводзіцца агляд усіх прыдамавых тэрыторый, згодна з якім складаецца спіс тых, якія патрабуюць рамонту. Асобна адзначаюцца двары, дзе неабходна першачарговае правядзенне асфальтавання або ўкладкі тратуарнай пліткі ці нейкія іншыя меры добраўпарадкавання.

Затым у межах вылучанага фінансавання фарміруецца праграма рамонту, у адпаведнасці з якой і дзейнічаюць камунальнікі.

Напрыклад, летась работы па добраўпарадкаванні двароў праходзілі на Рабоча-Сялянскай, 7 і 9, а таксама ў некалькіх дварах на вуліцы Сумчанкі. Сёлета ўжо прыведзены ў належны выгляд двор дома № 5 на Рабоча-Сялянскай вуліцы. Таксама закончана яго асфальтаванне, як і двара дома № 35 на Сацыялістычнай. Зараз камунальнікі прыступілі да рэканструкцыі дваровай тэрыторыі дома № 57А на цэнтральнай вуліцы горада. Пакуль ідуць падрыхтоўчыя работы, дэмантаж старых бардзюраў.

У гэтым годзе запланаваны таксама рамонт тэрыторыі двара на Савецкім пасёлку, 20. Яшчэ адным аб’ектам добраўпарадкавання стане ўстаноўка спартыўнай пляцоўкі каля аптэкі № 109.

Безумоўна, кіраўніцтва УКП ЖКГ хацела б правесці мадэрнізацыю значна большай колькасці двароў, але вымушана абмяжоўвацца тым, на якія хапае адпаведных сродкаў. Трэба адзначыць, што рамонт дваровай тэрыторыі — справа нятанная: нават самы мінімалістычны патрабуе некалькі дзясяткаў тысяч рублёў. Так што, чакаючы рамонту, жыхарам неабходна памятаць і аб тым, што ім самім трэба больш ашчадна ставіцца да тэрыторый агульнага карыстання.