Напачатку тыдня старшыня райкама прафсаюза АПК Святлана Сідоранка ў рамках рэспубліканскай акцыі “Наш жывёлавод” наведала комплекс ААТ “Авангард-Ніва” ў Вяззі.

Гэта важны аб’ект не толькі для гаспадаркі, але і для раёна: тут утрымліваецца больш за паўтысячы галоў буйной рагатай жывёлы, у тым ліку дойны статак — 340 кароў. Працуе на ферме дружны калектыў з 23 чалавек.

У сярэднім ад кожнай рагулі штодня атрымліваюць дзесяць кілаграмаў малака. Па меркаванні саміх жывёлаводаў, гэты паказчык можа быць лепшым, у тым ліку калі на ферме зрабіць тэхнічнае перааснашчанне: даільная зала “Елачка”, якая тут выкарыстоўваецца, ужо далёка не новая. Ну і, канечне, дакладнае выкананне тэхналогіі ніхто не адмяняў.

Прафсаюзны лідар пацікавілася ходам гаспадарчых спраў, ці своечасова працаўнікі забяспечваюцца спецформай, расказала аб магчымасці аздараўлення ў санаторыі. Асаблівых скаргаў з боку жывёлаводаў не было. Праўда, яны выказалі нараканне на няспраўнасць асвятлення ў складзе, дзе захоўваюцца кармы, таксама пажаданне, каб быў выдадзены абутак. Пытанні ўзяты пад увагу. Ну а завяршылася сустрэча сяброўскім чаяваннем: Святлана Уладзіміраўна прывезла калектыву вялікі смачны торт.