Міністр аховы здароўя ў Асіповічах
6 лістапада раён наведаў міністр аховы здароўя Васілій Жарко, і гэтая падзея не засталася па-за ўвагай землякоў: жадаючыя патрапілі на прыём да высокай пасадавай асобы, каб падзяліцца набалелымі — ва ўсіх сэнсах — праблемамі.
Напрыклад, грамадзянка Т. прыехала разам з дачкою ажно з Магілёва. Маці не вельмі даўно страціла сына, вось і прасіла міністра паспрыяць у высвятленні абставін, ці ёсць у гэтай смерці віна людзей у белых халатах. Жанчына расказвала эмацыянальна і горача, атрымаўся працяглы дыялог. Па скаргах будзе накіравана ў абласны цэнтр камісія, якая і расставіць кропкі над “і”.
Звярнуліся да міністра дзве жыхаркі райцэнтра, якія маюць анкалагічныя захворванні — просьбы абедзвюх былі задаволены. Так што наведваліся асіпаўчане з самымі рознымі пытаннямі: дзейнасць медыцынскіх устаноў і ўсё тое, што звязана са здароўем людзей, заўсёды выклікае павышаную ўвагу. I хоць прэтэнзій да медыкаў хапае, аднак для паляпшэння медабслугоўвання насельніцтва таксама робіцца нямала. Возьмем хаця б тое, што з нядаўняга часу ў рэгістратуры райпаліклінікі ўстаноўлены дадатковыя нумары тэлефонаў: 170, 50-8-81 і 50-8-82. Значыць, будзе прасцей датэлефанавацца, каб запісацца да ўрача…
Падводзячы вынікі прыёму, Васілій Жарко адзначыў, што, нягледзячы на ўсе цяжкасці медыцынскай прафесіі, неабходна надзяляць пацыентаў максімумам увагі і імкнуцца дапамагчы чалавеку любымі спосабамі. Тым больш, калі гэта датычыць элементарнага накіравання да спецыялістаў у абласны цэнтр ці сталіцу.
Завяршыўся візіт міністра наведваннем будпляцоўкі новага корпуса раённай бальніцы. I на пытанне, калі нарэшце асіпаўчане будуць мець доўгачаканую ўстанову аховы здароўя, Васілій Iванавіч паабяцаў, што ў канцы наступнага года.
Валянціна КОРБАЛЬ.
