Ці часта даводзілася вам сустракаць дзяўчынак, якія захапляюцца картынгам? Нават тыя, хто мае дачыненне да гэтага віду спорту, адкажуць адмоўна. Нашых юных прыгажунь хутчэй цікавяць больш жаночыя справы, хаця, безумоўна,  бываюць і выключэнні. Напрыклад, пяцікласніца СШ №1 Крысціна Патапейка ўжо другі год наведвае гурток па картынгу на базе ЦТДіМ, якім кіруе Уладзімір Баранаў.

— Для свайго ўзросту дзяўчынка незвычайна дапытлівая,  — гаворыць  ён. — Летась удзельнічала ў конкурсе юных інспектараў руху, заняла прызавое месца па правілах. Яна лепш за некаторых хлопцаў спраўляецца і з  тэхнікай.

—  Як цябе захапіў такі незвычайны занятак? — пытаюся ў Крысціны.

— Аднакласнік Дзяніс Яцышэн расказаў. Ён якраз ужо хадзіў на гурток. Вырашыла пайсці з ім і паглядзець, як праходзяць заняткі. А пасля і сама стала іх наведваць. З цікавасцю слухала педагога, старанна выконвала ўсе парады. І калі ўпершыню села за руль карта, то праехала лепш за іншых. Некаторыя чамусьці блыталіся, баяліся. А мне першая язда спадабалася.

— У спаборніцтвах прымала ўдзел?

— Пакуль не было такой магчымасці, але хацелася б паглядзець, як спраўляюцца з упраўленнем дзеці з іншых раёнаў, асабліва дзяўчынкі. На жаль, нашы машынкі зараз няспраўныя: тармазная вадкасць не паступае,  са свечкамі праблемы і яшчэ там штосьці.  Чакаем, пакуль адрамантуюцца, і тады працягнем навучанне.

— У дзіцячым садку, напэўна, гуляла з машынкамі?

— Многія дзяўчынкі здзіўляліся, чаму не цікаўлюся лялькамі. Мне іх спачатку куплялі, але потым зразумелі, што дарэмна трацяць грошы. Машынак таксама не было. Але калі б выбірала, то спынілася на другім. Ведаю назвы многіх аўтамабіляў, мару атрымаць вадзіцельскія правы і, як бацька, ездзіць па розных краінах — ён кіруе вялікай машынай. Часта забіраюся да яго ў кабіну. А яшчэ памятаю, калі ўпершы раз самастойна праехала на квадрацыкле. Было мне тады пяць гадоў. Разам з бацькамі адпачывалі ў Егіпце. Бачыла, што некаторыя катаюцца на нейкай незвычайнай тэхніцы. Мне таксама захацелася. Родныя дазволілі рызыкнуць. Дзякуй ім за гэта. Уражанні незабыўныя. Наогул люблю ўсё, што едзе: ролікавыя і звычайныя канькі, лыжы, скейт.

—Чым яшчэ захапляешся?

—Наведваю музычную школу, займаюся вакалам. Стараюся паспяхова вучыцца. Калі застаецца вольны час, сустракаюся з сяброўкамі.  Дарэчы, яны мяне зараз чакаюць. У нас жа канікулы, збіраемся пакатацца на роліках.

Чым, чым, а гіпадынаміяй Крысціна не пакутуе. Наадварот, вядзе рухомы лад жыцця. Прываблівае сваёй шчырасцю, непасрэднасцю, гарэзлівасцю. І верыцца, што дзяўчынцы пакарацца многія нязведаныя вяршыні. Няхай яно так і будзе!

Ніна ВІКТОРЧЫК.