Электрычнасць — самы танны, універсальны, просты ва ўжыванні і найбольш даступны від энергіі. Аднак толькі з пункту гледжання спажыўца. Для тых, хто адказвае за бесперабойнасць ды падтрыманне якасных паказчыкаў электразабеспячэння, усё не так адназначна.

Для Асіповіцкага раёна электрычных сетак РУП “Магілёўэнерга” гэты год можна лічыць звычайным — у тым сэнсе, што людзі і тэхніка працавалі рытмічна і абышлося без форс-мажораў. Апошні раз сур’ёзныя праблемы з падачай электрычнасці ў рэгіёне былі зімой 2016 года, падчас незабыўнага ледзянога дажджу з рамантычнай назвай “Даніэла”. Аднак так шчасціць не ўсім. Нядаўна нашы энергетыкі камандзіравалі дзве рамонтныя брыгады ў Клімавіцкі раён, які пацярпеў ад моцнага снегападу. Мясцовым электрасеткам дапамагалі ўзнавіць работу калегі з усёй вобласці.

Што ж тычыцца будзённых спраў нашых электраэнергетыкаў, то яны такія: праведзены капрамонты паветраных ЛЭП напружаннем 0,4 кілавольта агульнай працягласцю 84,3 км і 41 км дзесяцікілавольтавых ліній. Адрамантавана 74 трансфарматарныя падстанцыі, яшчэ пяць заменены на сучасныя мачтавыя. Яны больш надзейныя, бяспечныя, каштуюць танней і маюць павышаны каэфіцыент карыснага дзеяння. Што цікава, у трансфарматараў даволі дакладным паказчыкам эфектыўнасці работы з’яўляецца… гук. Калі яго няма, усё ў межах дапушчальнага. А як чуецца характэрнае гудзенне, трансфарматар трэба мяняць. Ён, канечне, можа працаваць яшчэ доўга, але страты энергіі ў ім будуць недапу-шчальна высокія.

Дарэчы, аб рэкордных тэрмінах работы электраабсталявання. Сёлета праведзена замена падземнай кабельнай лініі даўжынёй 2,6 км, якая сілкуе спажыўцоў у Чыгуначным мікрараёне Асіповічаў. Яна была пракладзена яшчэ ў 1962 годзе і мела тэрмін эксплуатацыі 25 гадоў. Аднак лінія пратрымалася 60 гадоў і, хоць усё яшчэ працавала бездакорна, далейшая яе эксплуатацыя была прызнана немэтазгоднай. Усё ж рэзервы надзейнасці не бясконцыя.

А менавіта павышэнне надзейнасці сістэмы падачы энергіі можна лічыць галоўным кірункам дзейнасці Асіповіцкага РЭС. Трэнд часу — пераход на лічбавыя сістэмы кіравання, што павінна выправіць самае вузкае месца існуючай энергасістэмы. Калі ўзнікае патрэба ўнесці змены ў камутацыю яе асобных частак (для ліквідацыі аварыі ці планавага рамонту), камп’ютарызаваная сістэма кіравання дазваляе зрабіць неабходныя пераключэнні амаль імгненна і з удзелам аднаго дыспетчара. Без “разумнай” электронікі гэта працэдура даволі працяглая і патрабуе намаганняў значнай колькасці людзей.

Зараз рэалізуецца праект аўтаматызацыі сеткі 10 кілавольт, якая ўключае восем паветраных ЛЭП і 22 трансфарматарныя падстанцыі. На жаль, у гэтай справе ўзніклі перашкоды: частка крытычна важнага абсталявання, на якое разлічвалі, не пастаўляецца ў краіну з-за санкцый. Спатрэбілася шукаць альтэрнатыўныя варыянты, у тым ліку наладжваць уласную вытворчасць. За гэтую справу ўзялося адно з падраздзяленняў РУП “Магілёўэнерга” — філіял “Энергарамонт”, — і ў яго нядрэнна атрымліваецца. Так што ёсць спадзяванні разлічваць на аптымістычны графік узгаданай аўтаматызацыі. Першая чарга —  2023 год, завяршэнне праекта — 2024-2025…

Зараз яшчэ раз узгадаем “Даніэлу”. Адной з высноў, зробленых з аналізу ўплыву зімовага цыклону атыповай сілы на сістэму перадачы электраэнергіі, стала неабходнасць забеспячэння паветраных ліній правадамі ў суцэльнай ізаляцыі і замена паветраных ЛЭП кабельнымі ў лясістай мясцовасці. Замена правадоў ідзе планава, а вось з пераходам на кабель спачатку быў пастаўлены эксперымент. Падземная лінія даўжынёй 2 км створана ў раёне вёскі Навасёлкі і знаходзіцца ў эксплуатацыі ўжо пяць гадоў. Вынікі выдатныя, так што атрыманы вопыт будзе маштабіравацца і, верагодна, не толькі ў нашым раёне.

…Людзей, якія працуюць у арганізацыі, аб’ядноўваюць пэўныя агульныя рысы. Яны вельмі добра ведаюць сваю справу і сур’ёзна да яе адносяцца. Інакш нельга, бо без такога стаўлення ў гэтай прафесіі не затрымаешся. Сёння ў калектыў Асіповіцкага РЭС уваходзіць 82 чалавекі, якія падзяляюцца на пяць рамонтных брыгад і аварыйна-дыспетчарскую службу. Чым хто займаецца, увогуле зразумела з назвы падраздзяленняў. Ну а што тычыцца асабістага ўкладу ў агульны вынік, то тут можна вызначыць шасцёрку лідараў: майстар Уладзімір Койпіш, электраманцёры Аляксандр Янцэвіч, Міхаіл Самарцаў, Аляксандр Міхадзюк, Дзмітрый Сідараў, дыспетчар Аляксандр Габрыель.

Трэба падкрэсліць, што адстаючых у калектыве няма, таму лепшым стаць зусім няпроста. І тым пачэсней такое дасягненне!