У сферы сельскай гаспадаркі механізатар заўсёды знаходзіцца ў ліку найбольш запатрабаваных работнікаў. Прафесія гэта — нялёгкая, затое пра яе прадстаўнікоў справядліва кажуць, што яны ў самым прамым сэнсе кормяць людзей: шмат у чым дзякуючы іх рабоце на палях расце хлеб. Віктар Кадчык з КСУП “Ясеньскае” добра знаёмы з усімі тонкасцямі гэтай важнай справы.

Працуе ён у сельскай гаспадарцы з 2011 года. Пасля школы атрымаў пасведчанне вадзіцеля адпаведнай катэгорыі і пачаў кар’еру. Аднак і да гэтага моманту хлопец ужо шмат чаго ведаў і ўмеў.

— Мой бацька ў “Ясеньскім” працаваў шмат гадоў. Я ж каля яго ў дзяцінстве круціўся, дапамагаў. Адсюль і любоў да машын, — расказвае механізатар.

Мужчына добра памятае свой першы трактар МТЗ-82, досыць просты ў абслугоўванні і надзейны, на змену якому прыйшоў МТЗ-3522. Новая тэхніка атрымана тры гады таму і прыемна здзівіла не толькі зручнасцю кабіны, але і павышанай магутнасцю.

Аднак любая сельскагаспадарчая машына не выносіць бяздзейнасці, таму механізатары заўсёды патрэбныя: практычна кругласутачная праца ў полі падчас пасяўной і ўборачнай, а ў міжсезонне — клопат пра жывёлу гаспадаркі, падвоз кармоў і вываз арганікі. Памяняць гэтую прафесію на іншую думкі ў Віктара не ўзнікала.

— Люблю сваю справу, — усміхаецца аграрый. — Яна з тых, дзе ў пашане адказнасць і працавітасць.