10 лістапада на Магілёўшчыне стартаваў аўтапрабег у рамках рэспубліканскай акцыі “Сімвал адзінства”. Арганізавала мерапрыемства грамадскае аб’яднанне “Патрыёты Беларусі” пры падтрымцы Федэрацыі прафсаюзаў Беларусі. Усяго шлях па рэгіёне склаў 1200 кіламетраў, а Асіповічы сталі апошнім з райцэнтраў Прыдняпроўскага краю, які вітаў удзельнікаў патрыятычнай акцыі.

Сёння надвячоркам жыхары горада — многія з якіх далучыліся да аўтапрабегу на ўласных машынах — сустракалі аўтакалону на ўездзе ў горад каля спартыўна-аздараўленчага комплекса “Жамчужына”. Прывітальныя песні, хлеб-соль і найлепшыя пажаданні гучалі ад землякоў.

Далей працэсія перамясцілася на пярон чыгуначнага вакзала: тут, каля помніка Фёдару Крыловічу, прайшоў урачысты мітынг з удзелам прадстаўнікоў працоўных калектываў, грамадскіх аб’яднанняў, моладзі. Ля помніка была ўстаноўлена таблічка з QR-кодам, сасканіраваўшы які мабільным тэлефонам, можна атрымаць дэталёвую інфармацыю аб слаўным падпольшчыку, які ў ліпені 1943 года ўчыніў самую буйную дыверсію на чыгунцы за ўвесь перыяд Вялікай Айчыннай вайны і ,безумоўна, паспрыяла поспеху Чырвонай арміі ў Курскай бітве. Вынікам дыверсіі Крыловіча стала знішчэнне значнай колькасці гаручага і бронетэхнікі, у тым ліку танкаў “Тыгр” — кожны з якіх падчас аперацыі “Цытадэль” быў для ворага літаральна незаменным.
Завяршаецца акцыя святочным канцэртам, які зараз ідзе ў ГЦК “Равеснік”.

Больш фота тут