У “АК” № 79 ад 11 верасня паведамлялася аб ходзе работ на станцыі абезжалезвання на водазаборы “Паўночны”. Але паколькі на мінулым тыдні ад жыхароў дамоў 45 і 49 на вуліцы Сумчанкі, 39, 45 і 46 на вуліцы Сташкевіча, а таксама 11, 17 і 21 на вуліцы 60 гадоў Кастрычніка і іншых паступала шмат нараканняў на якасць пітной вады, вырашылі вярнуцца да тэмы.

На запыт у раённы цэнтр гігіены і эпідэміялогіі быў атрыманы адказ, у якім падкрэсліваецца, што праведзеная   12 кастрычніка чарговая праверка водаправоднай сеткі паказала поўную адпаведнасць вады па мікрабіялагічных паказчыках. Па санітарна-хімічных жа ў адной з дзесяці проб адзначалася павышанае ўтрыманне жалеза. Але пасля праведзенай у гэты дзень Асіповіцкім участкам водаканальнай гаспадаркі філіяла “Бабруйскводаканал” урэзкі ў водаправодную сетку якасць пітной вады значна пагоршылася. Адзначалася павышаная мутнасць, з-за чаго немагчыма было выкарыстанне вады для прыгатавання ежы. А насельніцтва не было папярэджана аб правядзенні работ у водаправоднай сістэме, таму не змагло запасціся чыстай.

Начальнік гарадскога ўчастка водаправодна-каналізацыйнай гаспадаркі Віктар Пышны пракаменціраваў сітуацыю так:

— Калі работы праводзяцца ў канкрэтным доме ці на невялікім участку, папярэдне апавяшчаем насельніцтва. Напрыклад, зараз нашы брыгады працуюць на вуліцах Каралёва, Сацыялістычнай — жыхары ў курсе спраў.

Падчас пусканаладачных работ, якія ідуць на станцыі абезжалезвання на водазаборы “Паўночны”, правялі першую ўрэзку ў водаправодную сетку ў раёне перакрыжавання вуліц Юбі-лейнай і Сташкевіча. Без вады ніхто не застаўся, бо нашы работнікі пераправілі патокі, так бы мовіць, з адной трубы ў другую, але яе якасць у многіх дамах часова пагоршылася, таму што з—за перамены кірунку вады з унутранай паверхні труб сарвала пэўную колькасць адкладанняў. А паколькі ў гэтым месцы ідзе разгалінаванне па ўсіх напрамках, прадугледзець, дзе якасць вады пагоршыцца, і, адпаведна, папярэдзець жыльцоў на прадпрыемстве не здолелі.

Каб станцыя ўступіла ў эксплуатацыю, неабходна зрабіць яшчэ адну ўрэзку ў водаправодную сетку, так што раптоўнае пагаршэнне якасці вады верагодна. Да таго ж пасля пуску аб’екта на працягу некалькіх месяцаў будзе праходзіць прамыўка труб, і толькі пасля яе завяршэння асіпаўчане  атрымаюць чыстую пітную ваду, аб якой даўно мараць.