У раённым Савеце дэпутатаў днямі адбылася чарговая сорак шостая сесія, на якой прысутнічалі дэпутаты, старшыні сельсаветаў, начальнікі ўпраўленняў і аддзелаў райвыканкама, кіраўнікі арганізацый, члены Маладзёжнага парламента.

Пра далейшае ўдасканальванне адукацыйнага працэсу на Асіповіччыне ў адпаведнасці з Кодэксам аб адукацыі краіны, які ўступіў у сілу 1 верасня бягучага года, расказала начальнік аддзела па адукацыі райвыканкама Ірына Сяргейчык. Таксама дакладчык падрабязна спынілася на паглыбленні ідэалагічнага, грамадзянскага і патрыятычнага выхавання дзяцей.

Год гістарычнай памяці праходзіць пад знакам захавання гераічнай спадчыны і праўды пра ўсе перыяды жыцця беларускага народа. У сувязі з гэтым у кожнай установе агульнай сярэдняй адукацыі пачнуць дзейнічаць музеі, музейныя пакоі, тэматычныя экспазіцыі. Значнай падзеяй стала стварэнне ў маі на базе 51 гвардзейскай артылерыйскай брыгады ваенна-патрыятычнага клуба “Гарнізон”. Будзе працягвацца работа па фарміраванні ў вучняў паважлівых адносін да дзяржаўнай сімволікі.

Важны напрамак — выкладанне прадметаў на павышаным узроўні, што садзейнічае выяўленню і развіццю ў вучняў уменняў і навыкаў, звязаных з будучай прафесійнай дзейнасцю. У васьмі ўстановах агульнай сярэдняй адукацыі функцыянуюць класы педагагічнага кірунку, у СШ № 4 — профільная спартыўна-педагагічная група, на базе СШ № 1 — ваенна-патрыятычная, у гімназіі — прававы клас. Існуюць і іншыя профільныя аб’яднанні. Усе яны не толькі садзейнічаюць своечасовай прафесійнай арыентацыі вучняў, але і павышаюць іх паспяховасць.

У працяг тэмы дырэктар Жорнаўскай СШ Мікалай Пішчоў спыніўся на мэтазгоднасці павелічэння колькасці профільных класаў аграрнай накіраванасці. Адметна, што ствараюцца такія не толькі ў сельскіх, але і гарадскіх школах. Рабяты вывучаюць на павышаным узроўні асобныя прадметы, а заадно і знаёмяцца з работай сельгаспрадпрыемстваў, дзе ахвотна працуюць у час канікул. Усё гэта матывуе і дае магчымасць без цяжкасцей паступіць у сярэднія спецыяльныя і вышэйшыя ўстановы адукацыі выбранага кірунку. Аб профільным навучанні школьнікаў расказала і дырэктар гімназіі Святлана Мамсікава.

Разглядаліся на сесіі і іншыя актуальныя пытанні. У прыватнасці, аб ходзе выканання папярэдняга рашэння, якое датычыла арганізацыі вольнага часу землякоў, паведаміла загадчык сектара культуры райвыканкама Ірына Раманчук. Зараз на базе ўстаноў культуры працуюць чатыры пляцоўкі канцэртна-тэатральнага абслугоўвання. За кастрычнік-ліпень на пляцоўках было праведзена 111 мерапрыемстваў, з іх 73 канцэрты. Для жыхароў аддаленых маланаселеных вёсак аўтаклуб сумесна з клубнымі ўстановамі правёў 18 канцэртных праграм. Пры раённым гісторыка-краязнаўчым музеі створаны клуб “Літаратар”, які карыстаецца папулярнасцю сярод аматараў паэзіі. Робіцца і шмат іншага.

Дэпутаты абмеркавалі і другія пытанні, напрыклад, унеслі змяненні ў асобныя дзеючыя рашэнні, некаторыя прызналі страціўшымі сілу, перанакіравалі частку бюджэтных сродкаў у адпаведнасці з сённяшнімі патрэбамі. Па кожным пытанні прымаліся канкрэтныя рашэнні. Да трыбуны выходзілі спецыялісты розных галін, агучваючы разнастайныя пытанні, што пацвярджае: няма той сферы дзейнасці, якая б не цікавіла дэпутатаў. Гэта людзі з высокай жыццёвай актыўнасцю, якія пастаянна трымаюць руку на пульсе жыцця раёна.