Знаёмцеся

Дырэктар ДУА “Сярэдняя школа № 4 г. Асіповічы” Святлана Сувеева

Нарадзілася ў 1968 годзе ў пас. Ганчанскі Клічаўскага раёна. Пасля заканчэння мясцовай школы паступіла ў Магілёўскі дзяржаўны педінстытут імя А.А. Куляшова. Гістарычны напрамак выбрала яшчэ ў школе, дзе гэты прадмет выкладаўся вельмі цікава. Падчас вучобы пазнаёмілася з будучым мужам. Разам па размеркаванні накіраваліся ў г. Чашнікі Віцебскай вобласці, дзе яна два гады працавала метадыстам мясцовага Дома піянераў.

У Асіповічы сям’я пераехала ў 1992 годзе. Па 1996 год Святлана Яўгеньеўна займала пасаду інструктара па працы дзіцячага дома.

У сярэдняй школе № 4 працуе з 1996 года. Была настаўнікам гісторыі. З 2005 па 2007 гады — намеснік дырэктара па выхаваўчай рабоце. Апошнія 15 гадоў займала пасаду намесніка дырэктара па вучэбнай рабоце, днямі заняла пасаду дырэктара.

Мае вышэйшую кваліфікацыйную катэгорыю.

У планах новага кіраўніка павышэнне якасці ведаў вучняў, далейшае развіццё даследчай дзейнасці, захаванне высокіх пазіцый у спаборніцтвах рознай накіраванасці, а таксама грамадзянска-патрыятычнае выхаванне моладзі, у ходзе якога магчыма стварэнне клуба беларускай мовы. Да таго ж Святлана Яўгеньеўна плануе ўдасканаліць дзейнасць музея і этнаграфічнага кутка.

Да абавязкаў дырэктара сярэдняй школы № 4 прыступіць 1 верасня.