Дырэктар цэнтралізаванай бібліятэчнай сеткі Асіповіцкага раёна Святлана Нявесценка

Нарадзілася ў Асіповічах у сям’і ваеннаслужачага. У 1999 годзе скончыла 9 класаў сярэдняй школы № 3 і паступіла ў Магілёўскі дзяржаўны музычны каледж імя М.А. Рымскага-Корсакава. Скончыўшы вучобу, прыйшла працаваць настаўнікам па класе “баян-акардэон” у Татаркаўскую музычную школу. У 2015 годзе скончыла Беларускі дзяржаўны ўніверсітэт культуры і мастацтваў па спецыяльнасці “Культуралогія. Менеджмент міжнародных культурных сувязяў”. Працоўная дзейнасць працягнулася ў яслях-са-дзе № 10 “Расінка” ў якасці кіраўніка музычнага выхавання. Пасля перайшла ў гарадскі цэнтр культуры “Равеснік” кіраўніком гуртка. Наступная пасада Святланы Аляксандраўны — метадыст сектара інфармацыйна-аналітычнай дзейнасці раённага аддзела народнай творчасці і культурна-асветніцкай работы цэнтралізаванай клубнай сістэмы. Праз два гады атрымала павышэнне і стала загадчыкам сектара.

Пасаду дырэктара цэнтралізаванай бібліятэчнай сеткі Святлана Нявесценка займае з 10 жніўня.

— Праца ў бiблiятэках да-кладная, размераная, але час дыктуе патрэбу ў пераменах. Першы крок — стварэнне асветніцкіх праектаў і праграм. Такая дзейнасць спрыяе прыцягненню як рэальных, так і віртуальных карыстальнікаў, стварае прывабны вобраз устаноў сеткі, а таксама робіць бібліятэку канкурэнтаздольнай на рынку інфармацыйна-адукацыйных паслуг. Вельмi хочацца наладзіць супрацоўніцтва з грамадскімі арганізацыямі і аб’яднаннямі, а таксама паўдзельнічаць у магчымых інклюзіўных праектах. Напрыклад, у бібліятэцы на вуліцы Сумчанкі ёсць некаторая літаратура для людзей са слабым зрокам, а таксама камп’ютар, праграмнае забеспячэнне якога арыентавана на чытачоў, якія дрэнна бачаць. Падобны вопыт заслугоўвае распаўсюджвання і ўдасканальвання. Цікава будзе наладзіць супрацоўніцтва і з установамі адукацыі, пачынаючы з дзіцячых садкоў. Зараз часта можна бачыць, што дзеці і моладзь чытаюць без натхнення. Значыць, патрэбна паказаць маладому пакаленню карысць чытання, прывіваць любоў да кнігі як да крыніцы незабыўных вобразаў i пачуццяў.

Святлана Аляксандраўна замужам. Мае дваіх дзяцей. Дачка Ксенiя вучыцца ў Гомельскім гандлёва-эканамічным каледжы па спецыяльнасці “Эканоміка і арганізацыя вытворчасці”. Сын Ягор вучыцца ў Мазырскім філіяле Гомельскага вучылішча алімпійскага рэзерву на аддзяленні акадэмічнай грэблі. Сёлета па выніках спаборніцтваў юнак атрымаў званне кандыдата ў майстры спорту.