Ліпень пераваліў за сярэдзіну, а гэта значыць, што лета пайшло на спад. Кожны дзень на дзве-тры хвілінкі карацейшы за папярэдні. Але не аб гэтым клопаты працаўнікоў сельгаспрадпрыемстваў: у іх зараз гарачая пара ўборкі. А ўраджай вырашчаны нядрэнны, запэўнівае намеснік дырэктара ААТ “Авангард-Ніва” Юрый Сычэвіч.

У гаспадарцы пад зерневыя адведзена 1 796 гектараў, з якіх 677 займаюць палеткі трыцікале. 280 га азімай і 55 яравой пшаніцы, 565 га жыта, 119 яравога і 50 азімага ячменю, а яшчэ 50 га грэчкі.

Аграрыі ўважліва сочаць за стадыямі развіцця культур. Першым саспеў азімы ячмень, яго ўжо паспяхова ўбралі. Дарэчы, ураджайнасць гэтай культуры даволі добрая: намалацілі больш за 180 тон. А яшчэ падрастае 250 га кукурузы. 260 га занята пад маслічныя — сурэпіцу і рапс.

Да ўборкі рапсу і прыступілі на гэтым тыдні працаўнікі гаспадаркі. Усяго на жніве задзейнічана шэсць кормаўборачных камбайнаў: гомельскія працаўнікі GS1218 і GS10, больш вядомыя як “Палессе”, якія працягваюць надзейна служыць сваім гаспадарам ужо не адзін год.

На полі за аграгарадком Карытнае сустрэлі вопытныя экіпажы ў складзе Уладзіміра Крэпскага і Аляксандра Пятровіча, а таксама Сяргея Горбеля і Іллі Кунца, якія выехалі на рапсавае поле, каб убраць вырашчанае. А рапс сёлета таксама радуе ўраджайнасцю. Значыць, будзем з алеем!